جاڭا جوباعا قاتىسىڭىز: «قازايتىس» سايتىندا - «قايران دا مەنىڭ قازاعىم!» دەپ اتالادى
ەندى سول جوبانىڭ ورىنىن «قايران دا مەنىڭ قازاعىم» اتتى جاڭا جوبا تولىقتىرماق.
قازاق تاريحىن جادىمەن جەتكىزگەن حالىق. قاعازعا تۇسكەن تاريحى ورتەلىپ، قولدى بولىپ، وزگەرتىلىپ جاتقاندا دا ءبىز ارعى دا اتا، بەرگى دە بابالارىمىز جايىنداعى تۇسىنىگىمىز باعدارىنان جاڭىلىسقان ەمەس.
ۇلتىمىزدىڭ ومىرگە كوزقاراسىن، جاراتۋشى مەن جاراتىلىس تۋرالى تانىم تۇسىنىگىن ماقال-ماتەلىنەن-اق ءتۇسىنىپ، ءار قازاقتىڭ اتا تاريحى اقساقالدار شەرتكەن شەجىرەدەن-اق تارقاتىلىپ جۇرە بەردى. جەتى اتامىز جادىمىزدا.
الايدا قازاق تاريحىنىڭ ادام ايتسا سەنگىسىز ايانىشتى كەزەڭدەرى بەلگىلى ءبىر عىلىمي جۇيەمەن جۇيەلەنىپ جالپاق جۇرتتىڭ جۇرەگىنە جازىلا قويعان جوق. ەڭ باستىسى تاريح ۇرپاق ساناسىنا جەتىپ، ۇلت بولاشاعى ءۇشىن قىزمەت ەتۋى كەرەك بولاتىن. باتپانداپ كىرىپ، سانانى سالداندىرعان ۇزاق ۋاقىتتىق وتارلىق ىندەت بويىمىزدان مىسقالداپ عانا شىعاتىنى زاڭدىلىق. ونىڭ نەسىن جاسىرايىق، تاۋەلسىزدىكتىڭ شيرەك عاسىرىنا جاقىنداعان تۇستا عانا ەتىمىز ءتىرىلىپ، قازاق رەتىندە ەڭسەمىز كوتەرىلە باستادى. شۇكىر!
ەل ارالاپ، بابالار بولمىسىنىڭ تەرەڭ سىرلارىنا قۇلاق قويىپ، جۇرەك اۋىرتىپ جۇرگەن جان بولسا بىلەدى، اتالارىمىز، اجەلەرىمىزدىڭ باسىنان وتكەن قيلى وقيعالار كوزگە جاس تۇندىرادى. كەيبىرى ەرلەندىرىپ، ەكىلەندىرىپ جىبەرەدى. كوپ قازاقتىڭ بەينەتقور ءھام ءمارتباتىر كەسەك كىسىلىك كەلبەتىنە ەرىكسىز ءتانتى بولاسىڭ. ەستي، ەستي ەسەڭگىرەپ كەتەسىڭ. بۇگىنگى بەيبىت زاماننىڭ بوداۋىنىڭ وسىنشاما اۋىر بولعاندىعىن سەزىنەسىڭ...
بۇل جوبا قازاقتىڭ باسىنان وتكەن قيلى قيىندىق پەن جانكەشتى ەرلىكتەرىنەن ەل-جۇرتقا ەستەلىك ۇسىنا وتىرىپ، بۇگىنگى ۇرپاقتى بابالار بولمىسىنا بويلاتۋ ماقساتىندا قولعا الىنىپ وتىر.
جوبا شارتتارى:
جوباعا قاتىسۋشى اشارشىلىق، ساياسي قۋعىن-سۇرگىن، الاش قوزعالىسى، سوعىس، جەلتوقسان ىزعارى جانە بۇلاردان ىلگەرى، بۇلاردان كەيىنگى دە قازاقتىڭ باسىنان وتكەن نە قيلى وقيعالاردى تۇسىنىكتى تىلمەن بايانداپ بەرەدى. قازاقتىڭ كورگەن ەزگىسى جانە ەرلىگى جايىندا بۇگىنگى ۇرپاق بىزدەرگە ساباق بولارداي ساتتەرىن ەرەكشەلەپ كورسەتەدى.
ول اركىمنىڭ ءوز شەبەرلىگىنە بايلانىستى. ماتەريال اۋقىمى وتە كەڭ. ول اجەسىنەن نەمەسە اتاسىنان ەستىگەن وقيعالار بولۋى، ءتىپتى ايتەۋىر ءبىر داستارحاندا ەستىگەن، ەرەكشە كوڭىلىن تولقىتىپ، ەلگە ايتارلىقتاي، ونەگە الارلىقتاي وقيعا ەكەن دەپ كوڭىلىنە ءبىر ءتۇيىپ قويعان دۇنيە بولۋى مۇمكىن. تاعى سول سەكىلدى...
جوباعا قاتىسۋشىلار جاسىنا شەك قويىلمايدى جانە بۇركەنشىك ەسىممەن دە قاتىسۋعا بولادى. الايدا بۇركەنشىك ەسىممەن قوسا ءوزىنىڭ تولىق اتى-ءجونى مەن بايلانىس تەلەفوندارىن (مىندەتتى تۇردە) سايتىمىزدىڭ ەلەكتروندى پوشتاسىنا جىبەرەدى.
جوباعا جىبەرىلگەن ماتەريالدار سۇحبات رەتىندە بولسا دا، ءوز اتىنان بايانداسا دا، وزگەنىڭ اتىنان بايانداسا دا، قىسقاسى، سول وقيعانى جۇرەك تەربەردەي شىنايى جەتكىزە السا بولعانى. ءبىر ەسكەرتە كەتەر جايت، عىلىمي فاكتىلەرگە سايكەس ەمەس دەپ قورعالاپ جازباي قالۋعا بولمايدى. بۇل ەل ىشىندەگى اۋىزەكى اڭگىمە. ءسىز جازعان وقيعادان شىققان ءجىپ-ۇشىمەن تاعى ءبىر قازاق قيسىندىرا وتىرىپ سول وقيعانىڭ تاريحي نەگىزىن تاۋىپ الىپ، عىلىمي جۇيەگە ەنگىزىپ جىبەرۋى مۇمكىن عوي. ولاي بولىپ جاتسا بۇل دا ءبىزدىڭ ورتاق جەڭىسىمىز!
ماتەريال جازبا كۇيىندە دە، بەينەجازبا رەتىندە دە قابىلدانا بەرەدى. ماتەريالدى فوتوايعاقتارمەن ايشىقتاپ بەرەر مۇمكىندىك بولسا ءتىپتى جاقسى.
بەينەجازبانىڭ ۇزاقتىعى 15 مينۋت، جازباشا ماتەريالدىڭ ۇزاقتىعى 1 بەتتەن كەم، 4 بەتتەن (14 شريفت، 1 ينتەرۆال) ارتىق بولماۋى كەرەك. كەي ماتەريالدىڭ وقىرماندارعا ولشەمدى، ساپالى جەتۋى ءۇشىن رەداكسيا تاراپىنان ازداعان وزگەرىستەر بولۋى مۇمكىن ەكەندىگىن دە ەستەرىڭىزگە سالا كەتەيىك.
ماتەريالدى قابىلداۋ ءار اپتانىڭ باسىنان باستاپ بەيسەنبى كۇنى ساعات 18:00 گە دەيىن. قورىتىندى جۇما كۇنى جاريالانادى.
اپتاسىنا ءبىر جۇلدەگەر جانە «اي جەڭىمپازىنا» ءبىر ۇمىتكەر انىقتالادى. ياعني بىرەۋى اقشالاي جۇلدە السا (10000 تەڭگە كولەمىندە)، ەكىنشىسى «اي جەڭىمپازىن» انىقتايتىن اينالىمعا قاتىسۋعا مۇمكىندىك الادى.
ءبىر ايعا ءۇش قازى بەكىتىلەدى. ءار قايسىسى ءبىر اپتانىڭ جەڭىمپازىن انىقتاپ، اي سوڭىندا ۇشەۋى بىرىگىپ «اي جەڭىمپازىن» انىقتايدى. جەڭىمپازعا 30000 تەڭگە كولەمىندە اقشالاي سىيلىق بەرىلەدى. جانە ولار جىل سوڭىندا «جىل جەڭىمپازى» باسەكەسىنە قاتىساتىن بولادى.
العاشقى ايدىڭ قاتىسۋشىلاردىڭ ەڭبەكتەرىن سارالاپ، قازىلىق جاساۋشىلار:
الماس الماتوۆ. جىراۋ، قازاق ۇلتتىق ونەر ۋنيۆەرسيتەتىنىڭ پروفەسسورى، قازاقستاننىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى،
قونىسباي ءابىل. قازاقستاننىڭ حالىق اقىنى، ايتىسكەر، كومپوزيتور، «پاراسات» وردەنىنىڭ يەگەرى، قازاقستان رەسپۋبليكاسى پارلامەنتىنىڭ رەداكسيالاۋ جانە اۋدارما سەكتورىنىڭ مەڭگەرۋشىسى.
كوپەن امىربەك. ساتيريك، حالىقارالىق «الاش» ادەبي سىيلىعىنىڭ، «پاراسات» وردەنىنىڭ يەگەرى، قازاقستان جازۋشىلار وداعى ساتيرا كەڭەسىنىڭ ءتوراعاسى، ساياسي-قوعامدىق، ساتيرالىق «ارا» جۋرنالىنىڭ باس رەداكتورى.
سونىمەن، قازاعىم دەپ قانى تاسىپ، جۇرتىم دەپ جۇرەگى اۋىرا بىلەتىن بارلىق قاتىسۋشىعا ساتتىلىك تىلەپ جوبامىزدى باستادىق. ءبيسسىمىللا!
جوبا بويىنشا ساۋالدار بولسا حابارلاسىپ ۇعىسىڭىز.
E-mail: kazaitys.kz@mail.ru
whatsapp:
تەل: 87017898880
تەل: 87072126298
"Kazaitys.kz"