قازاق قىزى شيرەك فينالدا قىتاي قىزىمەن سايىسادى
ەلىمىزدىڭ اتىن بايراقتى باسەكەلەردە تانىتىپ جۇرگەن تەننيسشى «اسپان استى ەلىندەگى» جارىستىڭ 1/8 فينالىندا ماجار ەلىنىڭ سپورتشىسى تيمەا بابوشتى جەڭدى. ءبىر جارىم ساعاتقا سوزىلعان ويىندا وتانداسىمىز 6:3, 6:4 ەسەبىمەن باسىم ءتۇستى. ەستەرىڭىزدە بولسا، ءبىرىنشى ويىنىندا حورۆات قىزى دوننا ۆەكيچتەن باسىم تۇسكەن ەدى.
زارينا دياس شيرەك فينالدا 8- قاڭتار كۇنى قىتايلىق تەننيسشى چجەن سايسايمەن كەزدەسەدى. ول قازىرگى تاڭدا WTA رەيتينگىندە 97- ساتىعا جايعاسقان. ال قازاقستاندىق تەننيسشى بولسا سوڭعى جاڭارعان رەيتينگتە 32- ورىننان كورىنگەن بولاتىن. بۇل - زارينانىڭ سپورتتىق مانسابىنداعى ەڭ جوعارعى كورسەتكىشى.
«Shenzhen Open-2015» حالىقارالىق ءتۋرنيرىنىڭ جالپى جۇلدە قورى 500 مىڭ ا ق ش دوللارىن قۇرايدى. ال جەكەلەي سىندا جەڭىسكە جەتكەن سپورتشى 111163 دوللار كولەمىندە سىياقى الىپ، ودان وزگە 280 رەيتينگتىك ۇپايعا يە بولادى. قازىرگى تاڭدا شيرەك فينالعا شىققان وتانداسىمىز 8934 ا ق ش دوللارى مەن 60 ۇپاي ەنشىلەپ ۇلگەردى.