اسكەري قىزمەتشىلەر قازاقستاننىڭ وڭىرلەرىندەگى سوعىس ارداگەرلەرىن قۇتتىقتادى - فوتو
اتاپ ايتقاندا، تارازداعى گارنيزوندىق وفيتسەرلەر ۇيىندە مايدانگەرلەر قۇرمەتىنە سالتاناتتى ءىس-شارا ءوتىپ، قۇتتىقتاۋلار مەن سىيلىقتار ۇسىنىلدى، كونسەرت قويىلدى.
«2015-جىلى ءبىز ايتۋلى مەرەيتوي - ۇلى جەڭىستىڭ 70 جىلدىعىن اتاپ وتەمىز. سىزدەردى جاڭاجىلدىق مەرەكەمەن قۇتتىقتاۋ - ءبىز ءۇشىن اسقان قۇرمەت، ويتكەنى ءبىز سىزدەردىڭ جاۋىنگەرلىك تاجىريبەلەرىڭىزدى قاستەرلەيمىز، ءبىز ءۇشىن سىزدەر ۇلگى تۇتار تۇلعا بولىپ تابىلاسىزدار. جاس جاۋىنگەرلەر سىزدەردەن قاھارماندىق پەن ەرلىك ءتالىمىن الادى»، - دەدى ارداگەرلەرگە ءسوز ارناعان «وڭتۇستىك» وڭىرلىك قولباسشىلىعى اسكەرلەرى قولباسشىسىنىڭ ءبىرىنشى ورىنباسارى گەنەرال-مايور مارات قۇسايىنوۆ.
جامبىل وبلىسىندا 350 گە جۋىق ۇلى وتان سوعىسىنىڭ ارداگەرى تۇرادى. ءاربىر ارداگەرگە اسكەري بولىمدەر، بەكىتىلگەن. ولاردىڭ قولباسشىلىعى مايدانگەرلەرگە ۇنەمى بارىپ تۇرۋدى ۇيىمداستىرادى. اسكەري قىزمەتشىلەر گارنيزوندىق وفيتسەرلەر ۇيىنە كەلە الماعان ارداگەرلەردىڭ ۇيلەرىنە باردى. ولارعا بۇكىل «وڭتۇستىك» وڭىرلىك قولباسشىلىعى اسكەري قىزمەتشىلەرىنىڭ اتىنان سىيلىقتار تابىس ەتىلدى.
ال سەمەيدەگى زەينەتكەرلەرگە قىزمەت كورسەتەتىن وڭالتۋ ورتالىعىندا مايدانگەرلەرگە وڭىرلىك قولباسشىلىقتىڭ اسكەري وركەسترى كونسەرت سىيلادى.
اقتاۋدا اسكەري قىزمەتشىلەر قارتتار ۇيىندە تۇرىپ جاتقان سوعىس ارداگەرلەرى گاۆريل گەراسيموۆ پەن يۆان ماتۆەنكونى قۇتتىقتاپ، ەستەلىك سىيلىقتار تابىس ەتتى.