قوس كورەيا ۇزاق جىلعى تەكەتىرەستى توقتاتۋعا دايىن
ەسكە سالايىق، ءوزىنىڭ جاڭاجىلدىق قۇتتىقتاۋىندا ك ح د ر جەتەكشىسى كيم چەن ىن 2015-جىلى وڭتۇستىك كورەيا بيلىگى وكىلدەرىمەن ەڭ بيىك دەڭگەيدە كەلىسسوزدەر جۇرگىزۋگە دايىن ەكەنىن مالىمدەگەن بولاتىن.
«ۇكىمەت تايتالاستىق كوڭىل-كۇيدى رەتتەۋ ءۇشىن جانە كورەيارالىق ديالوگ پەن جەتىستىكتەرگە بىرلەسە ۇمتىلۋعا ەسىك اشۋ ءۇشىن بەلسەندى تۇردە كۇش سالاتىن بولادى»، - دەپ مالىمدەدى وڭتۇستىك كورەيا پرەمەر-ءمينيسترى. Yonhap اگەنتتىگىنىڭ حابارلاۋىنشا، چون حون ۆون: «بيىل ءبىز ماڭگىلىك بەيبىتشىلىك ورناتىپ، كورەيا تۇبەگىندە بىرىگۋگە ءبىر قادام جاساۋىمىز كەرەك»، - دەدى.
وڭتۇستىك كورەيا بىرىگۋ ىستەرى جونىندەگى ءمينيسترى ليۋ كيل دجە دە كيم چەن ىننىڭ توسىن مالىمدەمەسىنە قاتىستى كوزقاراسىن ءبىلدىردى. ونىڭ ايتۋىنشا، بۇل - وڭ مالىمدەمە جانە سەۋل قوس كورەيا اراسىندا ديالوگتى جىلدام باستاۋعا مۇددەلى.
مۇنىڭ الدىندا كيم چەن ىن «ەگەر ءتيىستى وڭ اسەرلەر مەن ودان كەيىنگى شارتتار بولسا، بىزدە بيىك دەڭگەيدە كەلىسسوزدەر جۇرگىزبەۋگە نەگىز جوق»، - دەپ مالىمدەگەن ەدى. ايتا كەتەيىك، كورەيا تۇبەگىندەگى قوس ەل 1953-جىلدان بەرى سوعىس جاعدايىندا ءومىر ءسۇرىپ كەلەدى. بەيبىتشىلىك تۋرالى كەلىسىمگە ءالى قول قويىلعان جوق. ەكى ەل اراسىندا بىرىگۋ ماسەلەلەرى تالقىلانعانىمەن، ءتۇرلى وقيعالارعا بايلانىستى جاعداي ءجيى شيەلەنىسىپ كەلەدى. ايتالىق، 2010-جىلى سارى تەڭىزدە وڭتۇستىك كورەيانىڭ «چحونان» اسكەري كەمەسى باتىپ كەتكەن كەزدە سوعىس تۋىنداي جازدادى. سەۋل كەمەنى سولتۇستىك كورەيا تورپەدامەن اتىپ ءتۇسىردى دەپ ەسەپتەيدى. ال پحەنيان تەرگەۋ ناتيجەلەرىنىڭ قولدان جاسالعانىنا سەنىمدى.
«الاش ايناسى»