ارمەنيا ەۋرازيالىق ەكونوميكالىق وداققا قوسىلدى

استانا. قازاقپارات - بۇگىن ارمەنيا رەسپۋبليكاسىنىڭ ەۋرازيالىق ەكونوميكالىق وداققا (ە ا ە و) قوسىلۋى تۋرالى شارت كۇشىنە ەنەدى. ارمەنيا بەلارۋس، قازاقستان جانە رەسەيمەن قاتار ەۋرازيالىق ەكونوميكالىق وداقتىڭ ءتورتىنشى تولىق قۇقىقتى مۇشەسى اتانادى.

ە ە ك باسپا ءسوز قىزمەتى حابارلاعانداي، وسى قۇجات ارقىلى ارمەنيا ەۋرازيالىق ەكونوميكالىق وداق تۋرالى شارتقا قوسىلادى. ەسكە سالا كەتسەك، استانادا 2014-جىلعى 29- مامىردا بىرلەستىككە مۇشە مەملەكەتتەر پرەزيدەنتتەرى الەكساندر لۋكاشەنكو، نۇرسۇلتان نازاربايەۆ، ۆلاديمير پۋتين شارتقا، سونداي-اق ە ا ە و قۇقىقتىق بازاسىنا كىرەتىن باسقا دا حالىقارالىق قۇجاتتارعا قول قويعان بولاتىن. 2015-جىلعى 2- قاڭتاردان باستاپ ارمەنيا ءتيىستى مىندەتتەمە الادى، بۇل رەتتە وداقتىڭ ءبىرىڭعاي نارىعىنا (170 ميلليون ادام) قول جەتكىزەدى.

ەۋرازيالىق ەكونوميكالىق وداققا قوسىلا وتىرىپ، مەملەكەت ەۋرازيالىق جوبانى ىسكە اسىرۋعا تولىققاندى كىرىسەدى.

قوسىلۋ تۋرالى شارت ارمەنيا وكىلدەرىنىڭ وداقتىڭ باسقارۋ ورگاندارىنىڭ جۇمىسىنا تولىقتاي كىرەتىنىن ايقىندايدى. شارت كۇشىنە ەنگەن ساتتەن باستاپ ارمەنيا پرەزيدەنتى جوعارى ەۋرازيالىق ەكونوميكالىق كەڭەستىڭ تولىققاندى مۇشەسى، ال پرەمەر-مينيستر ە ە ك كەڭەسىنىڭ وكىلىنە اينالادى. ەۋروازيالىق ەكونوميكالىق كوميسسيا القاسىندا ارمەنيانىڭ وداقتىڭ باسقا دا قاتىسۋشى ەلدەرى سياقتى ءۇش مۇشەسى بولادى.