اسكەري تەڭىز كۇشتەرىنىڭ دەمالىسى ءبىر كۇنگە ۇزاردى

استانا. قازاقپارات - ەلىمىزدىڭ اسكەري تەڭىزشىلەرى اپتانىڭ ءۇش كۇنىن وتباسىندا وتكىزەدى.

قازاقستان رەسپۋبليكاسى اسكەري تەڭىز كۇشتەرىنىڭ باس قولباسشىسى، كونتر- ادميرال جانداربەك جانۇزاقوۆتىڭ شەشىمىمەن 2015 - جىلدىڭ 1 - قاڭتارىنان باستاپ تەڭىزشىلەردىڭ جۇمىس كۇنى بۇرىنعىداي 6 كۇن ەمەس  5  كۇندىك بولىپ بەكىتىلدى.

 ال جۇما تۇسكە دەيىن جۇمىس ىستەيدى. بۇل كۇندى تەڭىزشىلەر ءوزارا «وتباسى كۇنى» دەپ اتاۋدى ۇيعارىپتى.   وزگە قۇرىلىمدارعا قاراعاندا اسكەري تەڭىز كۇشتەرىنە ارتىلار جۇك اۋىرلاۋ. ولار ءبىر جىلداعى 365 كۇننىڭ تەڭ جارتىسىن وتباسىنان جىراقتا،  تەڭىزدە وتكىزەدى. وسىنى ەسكەرگەن باس قولباسشى جانداربەك جانۇزاقوۆ بيىلدان باستاپ جۇمىس كۇنىن 5 كۇندىك ەتىپ بەكىتتى. كونتر- ادميرالدىڭ پىكىرىنشە بۇل اسكەريلەردىڭ رۋحاني دەمالۋىنا مۇمكىندىك بەرەدى. اتالعان تاجىريبە امەريكالىق اسكەري تەڭىزشىلەردەن الىنعان.