ەسكى جىلدى ريزالىقپەن شىعارىپ سالىپ، جاڭا جىل تابالدىرىعىن اۋقىمدى جوسپارلارمەن اتتادىق - ا. باتالوۆ
«وتكەن 2014-جىل وبلىس حالقى ءۇشىن جاقسى ىستەر مەن جاعىمدى جاڭالىقتارعا تولى بولدى. وڭىرلەردە جاڭا مەكتەپتەر مەن بالاباقشالار، ەمحانالار مەن كاسىپورىندار، باسقا دا ماڭىزدى نىساندار، جاڭا جۇمىس ورىندارى كوپتەپ اشىلدى. مىڭداعان جەتىسۋلىق وتباسىلار جاڭا پاتەرلەرگە كىرىپ، قونىس تويىن تويلادى. سپورتشىلارىمىز الەمدى مويىنداتىپ، ەلىمىزدىڭ ابىرويىن اسقاقتاتتى.
سوندىقتان ءبىز 2014-جىلدى ريزاشىلىقپەن شىعارىپ سالىپ، جاڭا 2015-جىلدىڭ تابالدىرىعىن اۋقىمدى جوسپارلارىمىزبەن، ەرەكشە جاۋاپكەرشىلىكپەن اتتادىق. مەملەكەت باسشىسىنىڭ «نۇرلى جول - بولاشاققا باستار جول» اتتى جولداۋىنداعى تاپسىرمالارىن ساپالى ورىنداۋعا قول جەتكىزۋ ءۇشىن تىنىمسىز ەڭبەكتەنىپ، تىندىرىمدى ءىس اتقارۋىمىز كەرەك»، - دەيدى ءوڭىر باسشىسى ءوز قۇتتىقتاۋىندا.
«قۇرمەتتى جەتىسۋلىقتار! جاڭا جىلدان كوپشىلىك يگى جاقسىلىق، ۇلكەن ءۇمىت كۇتەدى. ارمان-ماقساتتارىن بەلگىلەپ، جوسپارلارىن قۇرادى. سوندىقتان جاڭا جىلدا بارلىقتارىڭىزدىڭ ويعا العان نيەت-تىلەكتەرىڭىز ورىندالىپ، بيىك بەلەستەرگە، زور جەتىستىكتەرگە جەتۋلەرىڭىزگە تىلەكتەسپىن. بارشاڭىزدىڭ دەنساۋلىقتارىڭىز مىقتى، ەڭبەكتە جەمىستى، وتباسىلارىڭىز امان بولسىن! جاڭا جىل حالقىمىزعا يگىلىكتەر مەن جاقسىلىقتار، قۋانىش پەن شاتتىق، تولاعاي تابىس پەن بەرەكە-بىرلىك اكەلسىن!»، دەپ ىزگى تىلەگىن ءبىلدىردى ا. باتالوۆ.