قۇتقارۋشىلار ۇشاكتى ىزدەستىرۋ كەزىندە تاعى ءۇش ادامنىڭ مۇردەسىن تاپتى
بۇل تۋرالى باسپا ءسوز ءماسليحاتىندا ەلدىڭ ۇلتتىق ىزدەستىرۋ جانە قۇتقارۋ اگەنتتىگىنىڭ باسشىسى بامبانگ سوەليستيو حابارلادى، دەپ جازادى ت ا س س.
«ءبىز ءۇش ادامنىڭ مۇردەسىن شىعارا الدىق: ەكەۋى جولاۋشى ەر ادامدار جانە ەكيپاج مۇشەسى بولعان ءبىر ايەلدىڭ ءمايىتى»، - دەدى ول.
وسىلايشا، قازىرگى كەزدە ۇشاقتىڭ ىشىندە بولعان التى ادامنىڭ مۇردەسى تابىلعان.
سوەليستيونىڭ ايتۋىنشا، ىزدەۋ شارالارىنا قولايسىز اۋا رايى قيىندىق تۋدىرۋدا. اۋا رايىنىڭ قولايسىزدىعىنا بايلانىستى ىزدەۋ جۇمىستارى ۋاقىتشا توقتاتىلدى.
«ىزدەستىرۋ جۇمىستارى ءۇشىن جۇمىلدىرىلعان تەحنيكانىڭ ءبىر بولىگى ازىرشە كۇتۋ رەجيمىندە تۇر. اۋا رايى جاقسارعان كەزدە، ولارعا ىزدەۋ ورىندارىنا شىعۋ بۇيرىعى بەرىلەدى»، - دەدى ول.
قۇتقارۋ جۇمىستارىنا يندونەزيا باسشىلىق ەتۋدە، ويتكەنى AirAsia كومپانياسىنىڭ ۇشاعى رادارلاردىڭ نازارىنان بۇل ەلدىڭ اۋە كەڭىستىگىندە جوعالعان. ىزدەۋ توبىنىڭ قۇرامىنا سونداي-اق مالايزيا، كورەيا رەسپۋبليكاسى جانە سينگاپۋر وكىلدەرى كىرەدى. جالپى العاندا 30 عا جۋىق كەمە مەن قايىق، 15 ۇشاق، 20 عا جۋىق تىكۇشاق جۇمىلدىرىلعان.
ايتا كەتەيىك، 30- جەلتوقساندا قۇتقارۋشىلار لاينەردىڭ ىشىندە بولعان ءۇش جولاۋشىنىڭ مۇردەسىن تاپتى. بۇدان باسقا، پانگكالان-بۋن قالاسىنان وڭتۇستىك باتىسقا قاراي 160 شاقىرىم جەردەگى تەڭىزدە ىزدەۋ كەزىندە جولاۋشىلار سالونىنىڭ ەسىگى جانە جۇك بولىگىنىڭ ليۋگى تابىلعان بولاتىن.
ەسكە سالا كەتەيىك، جەكسەنبى كۇنى يندونەزيادان سينگاپۋرگە ۇشىپ شىققان Air Asia كومپانياسىنىڭ اۋە كەمەسى ۇشىپ شىققان ساتىنەن كەيىن 40 مينۋت وتكەن سوڭ ديسپەتچەر رادارىنان جوعالىپ كەتتى. ونىڭ بورتىندا 155 جولاۋشى جانە ەكيپاجدىڭ جەتى مۇشەسى بولدى.