قاراعاندىداعى قايىرىمدىلىق شىرشاسىندا ي. يلين مەن س. ساپيەۆ جەتىم بالالاردى قۇتتىقتادى - فوتو
قايىرىمدىلىق شىرشاسىندا جەتىم بالالاردى وليمپيادا چەمپيوندارى يليا يلين مەن سەرىك ساپيەۆ، الەم چەمپيونى جاسۇلان قىدىربايەۆ، ينچحونداعى ازيادا چەمپيونى مارگاريتا ەليسەيەۆا، نانكيندەگى 2 - جاسوسپىرىمدەر وليمپياداسىنىڭ جەڭىمپازى ابىلايحان ءجۇسىپوۆ سىندى تانىمال سپورتشىلار قۇتتىقتادى.
«بالالار، ەڭ باستىسى، وزدەرىڭە دەگەن سەنىمدەرىڭ بولۋى كەرەك. بۇل تەك سپورتتا عانا ەمەس، ءار ىستە ماڭىزدى. ماقسات بولاشاققا جول اشادى. ەگەر الدىمىزعا ماقسات قويىپ، سەنىمگە بەرىك بولساق، ءبارى دە ورىندالادى. بۇل مەنىڭ سەندەرگە دەگەن اعالىق تىلەگىم. سپورتپەن اينالىسىڭدار، بارلىق باعىتتاردا دامىڭدار. ءبىلىم الىپ، كىتاپتى كوپ وقىڭدار، ءتۇرلى تىلدەردى مەڭگەرىڭدەر»، - دەدى بالالارعا ارناعان سوزىندە ي. يلين.
وسىنداي كەزدەسۋلەر وتە قاجەت، دەپ سانايدى جاستايىنان اتا- اناسىنان ايىرىلىپ، بالالار ۇيىندە وسكەن م. ەليسەيەۆا.
«بۇل مەرەكەگە قاتىسۋ مەن ءۇشىن ماڭىزدى. بالالار مەنەن ۇلگى الىپ، جەتىستىكتەرگە جەتۋگە تالپىنىپ، سپورتپەن نەمەسە باسقا ءبىر ىسپەن اينالىسۋدان قورىقپاۋلارىن قالايمىن»، - دەپ ءوز ويىمەن ءبولىستى سپورتشى.
م. ەليسەيەۆا دا بالالار ۇيلەرىنىڭ تاربيەلەنۋشىلەرىنە دەگەن ىزگى تىلەكتەرىن ءبىلدىردى.
«مەن دە نەمەن اينالىساتىنىمدى بىلمەي ءجۇردىم. باسىندا سپورتپەن اينالىسۋعا قورىققان ەدىم، ويتكەنى ودان نە شىعارىن بىلمەدىم. بارلىعىڭا ءوز قورقىنىشتارىڭدى جەڭە بىلۋلەرىڭدى تىلەيمىن. ناقتى ماقسات قويا بىلىڭدەر. تابىس تىلەيمىن، ۇمىتتەرىڭ سونبەسىن. ءوز- وزدەرىڭە سەنسەڭدەر، بارلىق قيىندىقتاردى جەڭە الاسىڭدار»، - دەدى چەمپيون.
سپورتشىلار بالالارمەن شىرشانى اينالىپ، ويىندار وينادى. مەرەكەنىڭ سوڭىندا فوتوسەسسيا بولدى. چەمپيوندار وزدەرىنىڭ جاس تابىنۋشىلارىنا قولتاڭبالارىن تاراتتى.