باتىر اجە قامقا ۇشاقتى تىزگىندەپ، جاۋ شەبىن بومبالاعان
ۋكراينا، مانچجۋريا مەن قيىر شىعىستاعى سۇراپىل شايقاستارعا قاتىسىپ، ەلگە جەڭىسپەن ورالعان قامقا ۇمبەتالينا سوعىستان كەيىن بىلەك سىبانىپ، ەڭبەككە بەلسەنە ارالاستى.
ول ماڭعىستاۋ مەن اتىراۋدىڭ قارا التىنىن يگەرۋگە اتسالىسىپ، «بارلاۋشى حانشايىم» اتاندى. ەرلىگىمەن دە، ەڭبەگىمەن دە كوپكە ۇلگى باتىر اجەي جاڭا جىل قارساڭىندا پرەزيدەنتتىڭ قۇتتىقتاۋ حاتىن الدى.
كۇتپەگەن جەردەن ەلباسىنىڭ قۇتتىقتاۋ جەدەلحاتىن العان قامقا اجەي ەرەكشە تولقىپ، بالاشا قۋاندى. 92 جاستاعى كەيۋانا مەملەكەت باسشىسىنىڭ ساياساتىن قولداۋشى قارتتاردىڭ ءبىرى. ول ەلباسىنا ۇنەمى تىلەكشى بولىپ وتىرادى. سەبەبى سان ۇلتتىڭ بالاسىن ءبىر شاڭىراق استىنا ۇيىستىرىپ، تاۋەلسىزدىكتى نىق ۇستاۋدىڭ قانشالىقتى قيىن ەكەندىگىن بىلەدى قاريا.
قامقا ۇمبەتالينا، ۇلى وتان سوعىسىنىڭ ارداگەرى، قۇرمەتتى مۇنايشى:
- ارماندارىڭ جوق، اينالايىن. ەگەمەندىكتى الدىق. ۇلان بايتاق قازاقستاننىڭ كەڭ دالاسى، ونىڭ بايلىعى، ونىڭ وركەنيەتتى ازاماتتارىنىڭ ارقاسىندا قازىر ءبىز جامان ەمەسپىز. ەلباسىعا راحمەت. قيىن جاعدايدا ءبىزدى شايقالتپاي، كەمەنىڭ باستىعى ۇقساپ داعدارىستان دا، الەمدىك ساياسي قاقتىعىستاردان دا الىپ شىقتى. بارىنەن دە ءبىز قۇتىلىپ، ەگەمەندىگىمىزدى الىپ، قازىر شارۋاشىلىعىمىز ءوز قولىمىزعا ءتيىپ، تىم جاقسى بولىپ وتىرمىز.
قامقا ۇمبەتالينا بەيبىت ءومىردىڭ قادىرىن ەرتە ءتۇسىندى. ول نەبارى 18 جاسىندا وت كەشتى. اسكەري وقۋ-جاتتىعۋدان وتكەن بويجەتكەن جاۋعا قارسى اۋەدەن شابۋىل جاساۋ ءۇشىن IV ۋكراينا ۇرىسىنا جىبەرىلەدى.
قارشاداي قىز اۋىر بومبالاردى ۇشاقتارعا قولمەن تيەپتى. ونىڭ نەگىزگى قىزمەتى - جويقىن جارىلعىش زاتتاردى جاۋ جەرىنە لاقتىرۋ. «جاستىقتىڭ اسەرى مە ەشتەڭەدەن قورىقپايمىز، ويىمىزدا تەك وتانىمىزدى جاۋ قولىنان قالاي دا امان الىپ قالۋ عانا بولدى»، - دەپ ەسكە الادى قامقا اجەي.
قاريا جەڭىستى قيىر شىعىستا قارسى الادى. الايدا ول ءۇشىن سوعىس مۇنىمەن بىتپەيدى. جاۋىنگەر قىز جاپوندارعا قارسى ۇرىسقا دا ارالاسادى. بىردە جاۋ جەرىنە بومبا تاستاپ، قايتىپ كەلە جاتقاندا ول مىنگەن ۇشاقتىڭ موتورىنا جاۋ اتقان وق تيەدى.
ولاردىڭ قولىنا ءتۇسىپ قالماۋ ءۇشىن ەكيپاج مۇشەلەرى جالىنداعان قىزىل وتقا قاراماستان، ۇشاقتى كەڭەس جەرىنە اكەپ، سونان كەيىن عانا پاراشيۋتپەن جەرگە تۇسكەن.
قامقا ۇمبەتالينا، ۇلى وتان سوعىسىنىڭ ارداگەرى، قۇرمەتتى مۇنايشى:
- سەكىر دەگەن سوڭ سەكىردىك. پاراشيۋتپەن ءبىر اعاشقا ءىلىنىپ قالدىم. ۋسسۋرييسكايا تايگا، تومەندە جولبارىستار مەن ايۋلار شاۋىپ ءجۇر. ەلسىز، ءىلىنىپ قالعانىم جاقسى بولدى دەدىم. تاڭ اتقاندا ورىستىڭ ءبىر شالى كەلدى، قاسىندا ءنان ءيتى بار ەكەن. سودان نە كەرەك، 7 شاقىرىم ەكەن، پوسەلكەگە الىپ كەلدى، سوسىن مەن بولىمشەگە تەلەفون شالدىم.
سوعىستان كەيىن قامقا ۇمبەتالينا قازاق مۇنايىن يگەرۋگە اتسالىستى. كەيۋانا تاعدىردىڭ جازۋىمەن جولداسى مەن جالعىز ۇلىنان ەرتە ايىرىلدى. الايدا ەلى ءۇشىن وت كەشكەن قاريانى حالقى جالعىزسىراتقان ەمەس. الەۋمەتتىك قىزمەتكەرلەر كۇن سايىن قول ۇشىن بەرسە، جاس مۇنايشىلار اقىل سۇراپ، ءجيى حابارلاسادى.
www.khabar.kz