قازاق حاندىعىنىڭ قۇرىلۋى تۋرالى عىلىمي ەڭبەك جارىق كوردى

استانا. قازاقپارات - بۇگىن ءال-فارابي اتىنداعى قازاق ۇلتتىق ۋنيۆەرسيتەتىندە «قازاق حاندىعىنىڭ قۇرىلۋ تاريحى» اتتى عىلىمي ەڭبەكتىڭ تۇساۋكەسەرى ءوتتى.

مەملەكەت باسشىسىنىڭ تاپسىرماسىمەن كەلەر جىلى قازاق حاندىعىنىڭ 550  جىلدىعى اتاپ وتىلمەك.

«وسى ورايدا جارىق كورگەن مونوگرافيادا 60 تان استام شىعىس دەرەكتەرىنىڭ مالىمەتتەرى پايدالانىلدى»، - دەيدى كىتاپ اۆتورى، تاريح عىلىمدارىنىڭ دوكتورى بەرەكەت كارىبايەۆ. كىتاپتا قازاق حاندىعىنىڭ قۇرىلۋىنىڭ ەتنيكالىق جانە ساياسي العى شارتتارى، حاندىقتىڭ قۇرىلۋ بارىسى مەن كەزەڭدەرى، حاندىقتىڭ قۇرىلۋىنىڭ ماڭىزى قامتىلعان.

بۇل -  قازاق حاندىعى تۋرالى جارىققا شىققان تۇڭعىش مونوگرافيا. كىتاپتا تاريحي دەرەكتەرمەن قاتار اڭىزدار دا كەلتىرىلەدى. «قازاق تاريحىندا 40 قا جۋىق حان بولعان. ال ولاردى جاس ۇرپاق بىلە بەرمەيدى. قازاق مەملەكەتىن قۇرۋ جولىندا ەڭبەك ەتكەن تاريحي تۇلعالارىمىز تۋرالى ءالى دە كوپ زەرتتەۋلەر جاسالۋى كەرەك،» - دەيدى تاريحشىلار.

تالاس وماربەكوۆ، تاريح عىلىمدارىنىڭ دوكتورى، پروفەسسور

- قازاق حاندىعىن وزدىگىنەن جەكە مەملەكەت رەتىندە، قازاق مەملەكەتى رەتىندە قاراستىرۋ تاۋەلسىزدىككە دەيىن مۇمكىن بولمادى. سوندىقتان دا، بۇل قازاق حاندىعى تۋرالى العاشقى ىرگەلى كىتاپ. مۇنىڭ ماڭىزدىلىعى سوندا.

بەرەكەت كارىبايەۆ، تاريح عىلىمدارىنىڭ دوكتورى، پروفەسسور - تاريح بار جەردە، مىندەتتى تۇردە بولاشاق بولادى. ءبىزدىڭ مىندەتىمىز قازىرگى جاس ۇرپاققا مەملەكەتشىلدىك يدەيانى، مەملەكەتشىلدىك رۋحتى ءسىڭىرۋ. ءبىز اسىرەسە زيالى قاۋىم، عالىمدار وسىنى دارىپتەۋىمىز كەرەك.

 

www.khabar.kz