دارىگەر تاز بولىپ قالعانداردىڭ قولىنا تاراق ۇستاتتى
شاشتى قايتا قالپىنا كەلتىرەتىن ەمحاناسى شاعىن بولعانىمەن، اتاعى جەر جارىپ تۇر.
39 جاستاعى سادەكتىڭ دارىگەرلىك ماماندىقتى تاڭداۋى ءوز الدىنا جەكە اڭگىمە.
ونىڭ اكەسى ءال-حامداني وتكەن عاسىردىڭ 80- جىلدارى ءبىلىم الۋ ءۇشىن وتباسىمەن ۋكرايناعا كوشىپ بارعان.
ولار قاس قىلعانداي، سول ۋاقىتتا چەرنوبىل اتوم ەلەكتر ستانسياسىنان نەبارى 50 شاقىرىم جەرگە قونىس تەپكەن.
سادەك ءال-حامداني، دارىگەر:
- «جارىلىس كەزىندە ءبىزدىڭ بارىمىزگە زياندى ساۋلە ءوتىپ، يەمەنگە قايتىپ ورالدىق. وتباسىمىزداعى بارلىق ادامداردىڭ شاشتارى تۇسە باستادى. اكەم عىلىمي زەرتتەۋلەرمەن شۇعىلدانىپ، شاشتىڭ ءتۇسۋىن توقتاتاتىن نەمەسە ازايتاتىن ءادىس ويلاپ تاپتى».
«اكە كورگەن وق جونادى». كەيىن سادەك شاش وسىرۋگە ارنالعان ءوز ەمىن ويلاپ تاپتى. جاڭا ءدارى تەك شوپتەن جاسالادى. ونىڭ ناقتى قۇرامى قۇپيا. يەمەندىك دارىگەر ەرەكشە ەم تۋرالى ەشكىمگە ءتىس جارماي كەلەدى. ەڭ باستىسى، ەمدەلۋشىلەر وعان ءدان ريزا.
ءالي احمەد ءال- دجابري، ەمدەلۋشى:
- تولىقتاي تاز قالپىنا تۇسەمىن بە زارەم ۇشتى. ءبىراق، قازىر، قۇدايعا شۇكىر، ءبارى ورنىنا كەلدى. بۇرىن مەن باسىمدى جۋۋعا جانە شاشىمدى تاراۋعا قورقاتىنمىن، قازىر بۇل تۋرالى ويلامايمىن دا.
يەمەندە ءداستۇرلى ەمەس مەديتسينامەن اينالىسۋ وتە قاۋىپتى. وسىدان 2 جىل بۇرىن جەرگىلىكتى لاڭكەستىك توپتىڭ سودىرلارى «بۇل شاريعاتقا قايشى» دەپ شوپپەن ەمدەيتىن ايەلدىڭ باسىن شاپقان بولاتىن.
www.khabar.kz