گۇل سىيلاۋ قاعيدالارى
بۇرىن ءبىزدىڭ اتا-انالارىمىزدىڭ جاس كەزىندە ەر-ازاماتتارعا قالامپىر گۇلدەرىن، ال ايەلدەرگە قالعان تۇرلەرىن سىيلاۋ ءداستۇر بولسا، قازىر گۇلدىڭ الۋان ءتۇرى بار.
سونىمەن گۇلدەردى قالاي تاڭدايمىز؟
قىزمەتتەس ارىپتەستەرىڭىزگە ءسىزدىڭ رياسىز دوستىق كوڭىلىڭىزدى ايعاقتايتىن قىزعىلت، قىزىل تۇستەگى گۇلدەردى سىيلاۋ جاراسىمدى؛
اتا-اناڭىز ءوز ءداستۇرىن قۇرمەتتەيتىن كونسەرۆاتور بولسا، وندا سونى ۇستاناسىز، ەگەر جاڭاشا كوزقاراستىڭ ادامدارى بولسا، قاي ءتۇستى ۇناتاتىنىن ەسكەرە وتىرىپ، ۇلكەن گۇل شوعىن تارتۋ ەتكەنىڭىز ءسىزدىڭ جاقسى پەرزەنت ەكەنىڭىزدى بىلدىرەدى. جالپى اتا-اناڭىزعا، اسىرەسە اناڭىزعا مەرەكەلەردى كۇتپەي-اق اندا-ساندا گۇل، گۇلمەن بىرگە قۋانىش سىيلاپ تۇرۋدىڭ ەش ارتىقشىلىعى جوق.
مەرەيتويعا ارنالعان سەبەت نە گۇل شوقتارى ۇلكەن، قىمبات گۇل كومپوزيتسيالارىنان قۇرالادى؛
بيكەشتەرگە جىگىتتەر قالتاسىنا قاراماي گوللاند راۋشاندارىن نەعۇرلىم قوماقتى ەتىپ سىيلاسا، سوعۇرلىم ۇلكەن قۋانىشقا بولەيدى. قىزىل، قىزعىلت تۇستەردى قىزداردىڭ كوبى ماحابباتتىڭ، سۇيىسپەنشىلىكتى بەلگىسى دەپ ۇعادى.
ەر-ازاماتتاردىڭ ءبىرازى گۇلدى سىيلىق رەتىندە قابىلداي بەرمەيدى، ال ورتا جاستان اسقاندارعا بىرتەگىس، جىلتىر ەمەس قاپشىقتاعى شاعىن گۇلدەردى سىيلاۋعا بولادى.
گۇلدىڭ ورامىنا دا ءمان بەرۋ كەرەك، شاماڭىزعا قاراي ارينە.
گۇلدى قالاي سىيلايمىز؟
ۇلكەن قالالاردا ەشقايدا بارماي-اق فلوريستەرگە تەلەفون نە ينتەرنەت ارقىلى تاپسىرىس بەرۋگە بولادى. ولار ىشىنە گۇل سىيلاۋشىنىڭ يەسىنىڭ اتى-ءجونىن جازىپ، الىپ بارادى. ال ەگەر ءوزىڭىز تاپسىراتىن بولساڭىز، وڭ قولىڭىزبەن تابىس ەتەسىز.
ەگەر گۇلدىڭ سىرتى جاي ءمولدىر وراممەن كومكەرىلسە، ونى الىپ تاستاپ بەرۋدى ۇمىتپاڭىز.
ەگەر قىز بەن جىگىت بىرگە بارىپ، ايەل ادامدى قۇتتىقتايتىن بولسا، جىگىت تارتۋ ەتەدى.
مەرەيتويدىڭ يەسى ەر ادام بولسا، دا گۇل ونىڭ ايەلىنە بەرىلەدى.
گۇلدى قالاي قابىلداپ الامىز؟
العىس ايتىپ، ورامىنان الىپ، قوناقتار وتىراتىن بولمەدەگى قۇمىراعا سالىپ قوياسىز. الاسا، شاعىن گۇل شوعى بولسا، ۇستەلدىڭ ۇستىنە دە قويۋعا بولادى. ەگەر سىزگە ۇنامايتىن گۇل شوعى بولسا، سىر بەرمەي راقمەت ايتقانىڭىز ءجون.
اۆتور: فاريزا ابيلوۆا
massaget.kz