قازاقستان بۇل داعدارىستى دا لايىقتى ەڭسەرۋگە قاۋقارلى - ەلباسى
پرەزيدەنتتىڭ ايتۋىنشا، يندۋستريالاندىرۋدىڭ العاشقى بەسجىلدىعىندا ماشينا جاساۋ سالاسىندا تەمىرجول ۆاگوندارىن شىعارۋ 10 ەسەگە، ديزەلدىك لوكوموتيۆتەر 2,5 ەسەگە ارتقان. وسى بەس جىل ىشىندە وتاندىق اۆتووندىرىستە جەڭىل اۆتوكولىك شىعارۋ 12 ەسەگە، تراكتورلار 6 ەسەگە كوبەيگەن. ال مۇناي قوندىرعىلارىن شىعارۋ بۇعان دەيىنگى كورسەتكىشتەن 3 ەسەگە وسكەن.
«ءبىز حيميالىق ونەركاسىپتە شىعارىلاتىن ونىمدەر اتالىمىن كەڭەيتتىك. يندۋستريالاندىرۋدىڭ بەسجىلدىعىندا وتاندىق قۇرىلىس ماتەريالدارى 2 ەسەگە ارتتى. قازىر ءبىز قۇرىلىس ماتەريالدارىنىڭ 80 پايىزىن ءوزىمىز شىعارىپ كەلەمىز. ال ءبىز وسى جۇمىستى قولعا العاندا ول كورسەتكىش بار-جوعى 15 پايىز عانا ەدى. سەمەنت ءوندىرىسى ەكى ەسەگە ارتىپ، 4 ميلليون تونناعا جەتتى. ءبىز وسىنداي ءوندىرىس بولعاننان كەيىن عانا «نۇرلى جول» جاڭا باعدارلاماسىن ايقىندادىق. ايتپەسە، وندا ايتىلعانداردى نەمەن سالاتىن ەدىك؟» - دەدى نۇرسۇلتان نازاربايەۆ.
بۇدان بولەك، مەملەكەت باسشىسى فارماتسيەۆتيكا سالاسى دا قارقىندى دامىپ وتىرعانىن جەتكىزدى. بۇل رەتتە ەلباسى قازاقستانعا 800 ميلليون دوللارعا الەمنىڭ ءار تۇكپىرىنەن دارىلەر اكەلىنەتىنى تۋرالى ماسەلە كوتەرىلگەنىن ەسكە سالىپ، سول تۇستا ءدارى-دارمەكتىڭ كەمىندە ەلۋ پايىزىن مەملەكەتتە ءوندىرۋ تاپسىرماسى جۇكتەلگەنىنە توقتالدى.
«مىنە، وسى ۋاقىت ىشىندە مەديتسينالىق، فارماتسيەۆتيكالىق ونىمدەر ءتۇرى 500 بىرلىككە ارتتى. ال شىعارىلاتىن ونىمدەر ءۇش ەسەگە كوبەيدى. ياعني، مەن جۇكتەگەن تاپسىرما قازىردىڭ وزىندە 50 پايىزعا ورىندالىپ وتىر، وسىنى جالعاستىرۋ كەرەك»، - دەدى ق ر پرەزيدەنتى.
سونىمەن قاتار، ن. نازاربايەۆ اۋىل شارۋاشىلىعى سالاسى دا جوسپارلى تۇردە دامىپ كەلە جاتقانىن جەتكىزدى. ماسەلەن، اگروقۇرىلىمدا 2010-جىلمەن سالىستىرعاندا ءىرى قارا مال باسىنىڭ سانى 50 پايىزعا ارتقان. ال ونەركاسىپ جىلىجايلارىنىڭ الاڭى وسى جىلدار ىشىندە 3 ەسەگە وسكەن. «بۇگىنگى كۇنى قاراجات سالىپ، اۋىل شارۋاشىلىعىنىڭ ءونىمىن ءوندىرۋدى قولداۋ ارقاسىندا ءبىزدىڭ ىشكى نارىعىمىز ءوزىمىزدىڭ ونىممەن 80 پايىزعا دەيىن قامتاماسىز ەتىلىپ وتىر. ءبىز بيىلعى جىلى مال شارۋاشىلىعى ونىمدەرىن العاش رەت ەكسپورتتاۋدى باستادىق: ونىڭ كولەمى 6 مىڭ توننانى قۇرادى. بۇگىنگى جاعدايدا بۇل - اسا ماڭىزدى كورسەتكىش. ءبىز ءوزىمىزدى ازىق-تۇلىكتىڭ نەگىزگى تۇرلەرىمەن قامتاماسىز ەتە الامىز: ەتپەن، سۇتپەن، نان ونىمدەرىمەن، بۇيىرسا جەمىس-جيدەكتەرمەن دە تولىق. ەڭ باستىسى، بىزدە ەنەرگيا تاسىمالداۋ، وتىن دا ءبارى بار. وسىمدىك مايىن شەتەلدەن اكەلەتىنبىز، قازىر وزىمىزدەن شىعادى. ەتتى دە سىرتتان تاسيتىنبىز، قازىر ءوزىمىز شىعارىپ جاتىرمىز. قۇس ەتىن قازىر الىپ جاتىرمىز، ونى دا جابۋعا بولادى. ەشتەڭەدەن قورىقپاۋعا، ەشتەڭەگە قاراماۋعا دا بولادى. ءومىر سۇرە الامىز. مىنە، بۇل - ءبىزدىڭ تاۋەلسىزدىگىمىزدىڭ باستى قاعيداتى. وسى نەگىزگى كورسەتكىشتەر بۇدان ءارى ورنىقتىلانا تۇسسە، بىزگە ەش الاڭداۋدىڭ دا قاجەتى جوق. ءبىز بۇل داعدارىستى دا لايىقتى ەڭسەرەمىز. تۇيىندەي ايتساق، ءبىرىنشى كەزەكتە تۇتىنۋ تاۋارلارىنىڭ بارلىعى ەلىمىزدە تولىعىمەن قامتاماسىز ەتىلۋى ءتيىس. وتاندىق ونىمدەر وزىمىزدە شىعارىلىپ، وزىمىزدە ساتىلسا وندا ءبىز يمپورتقا دا تاۋەلدى بولمايمىز، ال بۇل دەگەنىڭىز ءبىز ودان سايىن تاۋەلسىز بولا تۇسەمىز دەگەن ءسوز»، - دەدى ن. نازاربايەۆ.
اۆتور: قانات مامەتقازى ۇلى