كەلەر جىلى ۇلتتىق ۆاليۋتانىڭ قۇنسىزدانۋى بولمايدى - و. قۇدايبەرگەنوۆ
بۇل تۋرالى جەكە پىكىرىن قازاقستان ەكونوميستەرى قاۋىمداستىعىنىڭ ديرەكتورى ولجاس قۇدايبەرگەنوۆ ءوزىنىڭ فەيسبۋكتەگى پاراقشاسىندا ءبىلدىردى.
«كەشە ق ر ۇكىمەتى مەن ۇلتتىق بانكىنىڭ بىرىككەن مالىمدەمەسى جاريالاندى. دوللارسىزداندىرۋ جاعدايىندا بۇل مالىمدەمە مەن ويلاعاننان جەڭىل كورىندى. ودان دا اۋىر نۇسقالارى ىقتيمال بولاتىن. مەملەكەتتىك باسقارۋ جۇيەسىندە قابىلدانعان شەشىمدەر ايقىندالدى. سىرتقى نارىقتاعى جاعداي ناشارلاپ كەتكەن جاعدايدا قولعا الىناتىن شارالار دا تۇسپالدانىپ ايتىلدى. ءبىراق ناقتىلانبادى. كەزەڭ- كەزەڭىمەن ناقتىلاناتىن بولار»، - دەدى و. قۇدايبەرگەنوۆ.
ونىڭ ايتۋىنشا، بىرلەسكەن قۇجاتتا مەملەكەت 2015 - جىلى تەڭگەنىڭ قۇلدىراۋى بولمايتىنىن جەتكىزدى. سونداي- اق مەملەكەتتىك كومپانيالار ۆاليۋتالىق پوزيتسيادا ءبىرى- بىرىمەن كەلىسىلگەن ساياسات جۇرگىزەدى دەگەن وي بار.
«ولار قاجەتتى مولشەردەن باسقا دوللارعا سۇرانىس تۋىنداتپاۋعا تىرىسۋى كەرەك. ەگەر بەلگىلى ءبىر تاۋارلار دوللاردىڭ كۇشەيۋ قاۋپىنەن ساتىلىپ الىنعان بولسا، ولاردىڭ قۇنىن تەڭگەگە اينالدىرىپ، نارىقتا ساتىپ جىبەرۋ كەرەك. حالىق پەن بيزنەستىڭ تەڭگەگە دەگەن سەنىمىن قايتارۋ ءۇشىن بۇل دوللارسىزداندىرۋ باعىتىنداعى العاشقى سالماقتى قادام. ەندى مەملەكەتتىك كومپانيالارداعى دوللار قورىنىڭ كولەمى ازايىپ، تەڭگە كۇشەيە باستايدى»، - دەدى ول.
ساراپشى دوللارسىزداندىرۋعا بانك سالاسى، سالىمشىلار كوپ ۇلەس قوسۋى كەرەك ەكەندىگىن ايتىپ ءوتتى.
«ەڭ الدىمەن دوللارمەن نەسيەسى بار ادامداردى تەڭگەگە اۋىستىرۋعا دەن قويۋ ابزال. زاڭدى تۇلعالاردا بۇل قايتا قارجىلاندىرۋ، جەكە تۇلعالار يپوتەكالىق قارىزدارى بار جاعدايدا قوسىلۋى مۇمكىن»، - دەدى و. قۇدايبەرگەنوۆ.
اۆتور: گۇلميرا عوسمانالي