ورالعا ۇلتتىق ۇلان ساربازدارىنىڭ جاڭا لەگى كەلدى - فوتو

ورال. قازاقپارات - ق ر ۇلتتىق ۇلانى «باتىس» وڭىرلىك قولباسشىلىعىنا قاراستى 5517 اسكەري بولىمىنە اقمولا، جامبىل جانە الماتى وبلىستارىنان 140 تاي جاس جاۋىنگەر كەلدى.

«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، ساربازداردىڭ جاڭا لەگى ءۇشىن بارلىق جاعدايى جاسالعان كازارمالار، وقۋ كورپۋسى، مەدپۋنكت ازىرلەندى. ولاردى ۇلتتىق ۇلان قاتارىنا قوسىلۋىمەن پولك كومانديرى، پودپولكوۆنيك ايان ەسجانوۆ قۇتتىقتاپ، اسكەري ءبولىم تاريحىمەن تانىستىردى.

ايتا كەتەيىك، جاڭادان كەلگەندەردىڭ جوعارى، ورتا جانە ورتا ارناۋلى بىلىمدەرى بار. ۇلتتىق ۇلان قاتارىندا اسكەري بورىشىن وتەگەننەن كەيىن ولار قالاۋىنا قاراي كەلىسىمشارتپەن قىزمەتىن جالعاستىرا الادى.

جاس جاۋىنگەرلەر ارنايى كۋرستان وتكەننەن كەيىن ق ر ىشكى اسكەرلەرىنىڭ 23 جىلدىعىنا وراي جاڭا جىلدىڭ 10 - قاڭتارىندا سالتاناتتى تۇردە انت بەرەدى.