ورالماندار قاعازباستىلىقتىڭ كەسىرىنەن باسپانادان قاعىلدى
قاراعاندىنىڭ ىرگەسىندەگى اقتاۋ ەلدى مەكەنىندە وسىدان ءۇش جىل بۇرىن قونىس اۋدارعان قانداستارىمىزدىڭ بۇگىنگى جاعدايى وسى. «نۇرلى كوش» باعدارلاماسىن شالا جۇرگىزگەن بيلىك وكىلدەرىنىڭ كەسىرىنەن، ەكى بىردەي وتباسى جالدامالى پاتەردە كۇنەلتۋگە ءماجبۇرمىز دەيدى. ويتكەنى جەڭىلدىكپەن بەرىلگەن باسپانادا اۋىز سۋ مەن جىلۋ جوق.
باسىنا باسپانا تۇگىل، ازاماتتىقتى دا الا الماي جۇرگەن وتباسى ورالمان كۋالىگىن الۋ ءۇشىن بىرنەشە ايدان بەرى سابىلىپ جۇرگەندەرىن ايتادى. اتامەكەنگە قونىس اۋدارعانىن راستايتىن قۇجاتسىز وزبەكستاننان كەلگەن ورالماندار مەملەكەتتىك جاردەماقىدان دا قاعىلعان. بار-جوعى ون توعىز مىڭعا قاراپ وتىرعاندار قازىر ساۋدا جاساۋدىڭ ارقاسىندا كۇن كورەدى.
تۇيمەگۇل سەرىكوۆا، اقتاۋ كەنتىنىڭ تۇرعىنى:
قازىر ۇيىمىزدە ءيا ىشپەك-جەمەگىمىز جوق، ءيا نانىمىز جوق. داستارحاندا از عانا نانىمىز بار. بولدى ەشقانداي ىشپەك-جەمەك جوق. اكىمدىككە ەكىنشى رەت بارعانىمىزدا اكىمدىك ەشقانداي كومەك بەرمەدى.
ال قازىردىڭ وزىندە قۇلاۋدىڭ ءسال-اق الدىندا تۇرعان باسپانانى اتقامىنەرلەر تۇيمەگۇل سەرىكوۆاعا بەرگەن جوقپىز دەپ باسىپ ايتتى. ءتىپتى، تىركەۋى جوق ورالمان وتباسى ءۇي كەزەگىندە تۇرماپتى دا. ەندى ەكى بولمەلى پاتەردى زاڭسىز پانالاعاندارعا اتقامىنەرلەر تەكسەرىس جۇرگىزەمىز دەيدى.
ۆەرا گۋبار، تەمىرتاۋ قالالىق تۇرعىن ءۇي سەكتورىنىڭ مەڭگەرۋشىسى:
ءبىز تۇيمەگۇل سەرىكوۆاعا ەشقانداي پاتەر بەرگەن جوقپىز. باسپاناعا ءوزى كىرىپ العان بولار. ءبىراق ونى تەكسەرىستىڭ ناتيجەسىندە بىلەتىن بولامىز. ول كىسىمەن جاقىن كۇندەرى كەزدەسىپ، سويلەسەمىز.
مەيرامگۇل سالقىمباەۆا، ءتىلشى:
وزبەكستاننان كوشىپ كەلگەن وتباسى بيلىكتەن تىم قۇرىعاندا باسپانامەن قامتاماسىز ەتۋدى سۇرايدى. ويتكەنى، شيەتتەي بالالارىمەن قىستا كوشەدە قالىپ قويامىز با دەپ قورقادى. ونىڭ ۇستىنە جالدامالى پاتەردىڭ يەسى الداعى ءبىر-ەكى اي ىشىندە ءۇيدى بوساتۋدى سۇراپتى. سوندىقتان ورالماندار باسشىلىق وڭ قاباق تانىتادى دەگەن ۇمىتتە.
31- ارنا