كەلەر جىلدان قوعامدىق ورىنداردا شىلىم شەگۋگە مۇلدە تىيىم سالىنباق
ياعني، مەيرامحانالار مەن قوناق ۇيلەردە، كاراوكە، تۇنگى كلۋبتار مەن اسحانالاردىڭ وزىندە تەمەكى شەگۋگە ارنالعان جەكە بولمەلەر جابىلادى دەگەن ءسوز.
«تەمەكى تۇتىنىنەن ازات قازاقستان» قوعامدىق كواليتسياسىنىڭ مۇشەلەرى بۇل وكپەسى قابىنىپ، جىل سايىن ءتۇرلى اۋرۋدان كوز جۇماتىن 25 مىڭ ادامدى قۇتقارىپ قالۋعا مۇمكىندىك دەسە، شاعىن جانە ورتا بيزنەس وكىلدەرى مۇنداي شەكتەۋ تابىسىمىزدى 30 پايىزعا قىسقارتادى - دەپ نارازىلىق تانىتىپ وتىر.
كەلەر جىلدان باستاپ قوعامدىق ورىنداردا شىلىم شەگەتىن ادامدارمەن كۇرەس كۇشەيتىلمەك. ءماجىلىس ماقۇلداسا، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە «كوپشىلىك ورىنداردا ارنايى جابدىقتالعان تەمەكى شەگۋ بولمەلەرىن جاپپاي جابۋ» تۋرالى وزگەرتۋ ەنگىزىلەدى. بۇل تۇزەتۋلەرگە نارازى كاسىپكەرلەر نورما قابىلدانسا، مەيرامحانا كىرىسىنىڭ جارتىسىنان قاعىلامىز - دەپ وتىر.
نۇرلان رىسقۇلوۆ، مەيرامحانا جەتەكشىسى:
دەمالۋعا كەلگەن ادام سول 5 ساعاتتىڭ ىشىندە تەمەكى شەكپەي وتىرا المايدى. سوندىقتان تەمەكى شەگۋگە ارنالعان ارنايى ورىندارى بولۋى كەرەك ءار رەستوراننىڭ. جارايدى، ءبىر تەمەكىنى شەگىپ الايىن، ودان كەيىن شەكپەيمىن دەپ ۋادە بەرەتىندەر بولادى. مۇلدە تىڭداماي، سوزگە كونبەيتىندەرى دە بولادى.
جالپى ەلىمىزدەگى ەرەسەك ادامداردىڭ 30 پايىزى تەمەكىگە تاۋەلدىلەر قاتارىندا. الايدا قوراپ سىرتىنداعى قۇبىجىق سۋرەتتەر مەن الەۋمەتتىك روليكتەر شىلىمقورلار قاتارىن ازايتۋعا ءدارمانسىز. ءدال ءقازىر اڭسارى اۋىپ، تەمەكى شەككىسى كەلىپ تۇرعان ادامدى، 10 جىلدان كەيىن قاتەرلى ىسىك اۋرۋىنا شالدىعۋىڭ مۇمكىن دەگەن ەسكەرتپە دە توقتاتپايدى - دەيدى ماماندار.
ازامات قايماقوۆ، زاڭگەر:
دەنساۋلىق ساقتاۋ مينيسترلىگىن ەسەبىن زەرتتەي كەلە، الماتى قالاسىندا شىلىمقورلاردى ەمدەيتىن 20 رەابيليتاتسيالىق ورتالىق اشىلعانىن بىلدىك. سەنسەڭىز، ءبىز سولاردىڭ ءبىر دە بىرەۋىن ىزدەپ تابا المادىق. تاپقان كۇننىڭ وزىندە ولار شىلىمعا قارسى پلاستر مەن ساعىز بەرىپ، جونىمىزگە جونەلتەتىنىنە سەنىمدىمىن.
«تەمەكى شەگۋگە ارنالعان ورىندارعا تىيىم سالۋ تاجىريبەسى باتىستىڭ ءبىرقاتار ەلدەرىندە ءتيىستى ناتيجە بەرگەن جوق. سونىڭ سالدارىنان مەيرامحانالارعا كەلۋشىلەر سانى شامامەن 30 پا- يىزعا قىسقاردى. الايدا تەمەكى شەگۋ دەڭگەيى تومەندەي قويمادى» - دەيدى يگور كوپايلوۆ.
يگور كوپايلوۆ، مەيرامحانا كاسىپورىندارى جانە قوناق ۇيلەر بيزنەسى قاۋىمداستىعىنىڭ پرەزيدەنتى:
ەگەر رەسەي تاجىريبەسىن ەسكەرەتىن بولساق، جارتى جىلدىڭ ىشىندە ويىن-ساۋىق ورىندارىنىڭ تابىسى 15-30 پايىزعا تومەندەگەن ەكەن. قازاقستاندا بۇل كورسەتكىش 20-40 پايىزعا ازايىپ كەتۋى مۇمكىن.
ماماندار مەملەكەت شىلىم شەگۋدى ماجبۇرلەپ ەمەس، ونىڭ زياندىلىعىن ءتۇسىندىرىپ، ازاماتتارىمىزدى يلاندىرا تۇسسە نيكوتينمەن كۇرەس تيىمدىرەك جۇرەر ەدى - دەگەن پىكىردە.
31-ارنا