ءبىز ادامداردىڭ وپات بولۋىن توقتاتۋعا سەپتىگىن تيگىزەتىن ءىس- قيمىلداردى ۇيلەستىرە الامىز دەپ ۇمىتتەنەمىن - ق ر پرەزيدەنتى
سونىمەن قاتار، ەكى ەلدىڭ كوشباسشىلارى ۋكرايناداعى احۋالدى، ونى بارلىق مۇددەلى تاراپتاردىڭ قاتىسۋى ارقىلى رەتتەۋ جولدارىن تالقىلادى.
بۇل تۋرالى اقوردانىڭ رەسمي سايتىندا حابارلاندى.
نۇرسۇلتان نازاربايەۆ ەكىجاقتى ىنتىماقتاستىقتىڭ ءبىرقاتار ءماندى ماسەلەلەرى جونىندە پىكىر الماسۋعا مۇمكىندىك بەرەتىن بۇل كەزدەسۋدىڭ ماڭىزدىلىعىنا توقتالدى.
- بارلىق قيىندىقتارعا قاراماستان رادا سايلاۋىن وتكىزىپ، ۇكىمەت قۇرا العاندىعىڭىز ءۇشىن ءسىزدى قۇتتىقتاعىم كەلەدى. بۇل - ءسىزدىڭ پرەزيدەنت رەتىندەگى العاشقى ۇلكەن جەڭىسىڭىز. مينسك حاتتاماسىنىڭ ازىرلەنۋى دە ءسىزدىڭ ەڭبەگىڭىز، - دەدى مەملەكەت باسشىسى.
قازاقستان پرەزيدەنتى ەلدەرىمىز اراسىنداعى ەكونوميكالىق بايلانىستاردى قالپىنا كەلتىرۋ جانە دەڭگەيىن كوتەرۋ قاجەتتىگىنە نازار اۋداردى.
- قازاقستاندا ۋكراينانىڭ كوممۋنالدىق جانە اۋىل شارۋاشىلىعى تەحنيكالارى كەڭىنەن قولدانىلادى، ازىق- تۇلىك اكەلىنەدى. ۋكرايناعا ءبىز دە ءوز ونىمدەرىمىزدى جەتكىزىپ وتىردىق. 4 ميلليارد دوللاردى قۇراعان تاۋار اينالىمىنىڭ كولەمى كۇرت تومەندەدى. ءبىراق بۇرىنعى كورسەتكىشكە جەتۋگە ءبىزدىڭ مۇمكىندىگىمىز بار. بۇل ورايدا، ۇكىمەت ارالىق كوميسسيا تاباندى جۇمىس جۇرگىزىپ، ىنتىماقتاستىق جولدارىن تابۋى ءتيىس. مەن ونداي مۇمكىندىكتەردىڭ بار ەكەنىن بىلەمىن، - دەدى نۇرسۇلتان نازاربايەۆ.
مەملەكەت باسشىسى ۋكراينا توڭىرەگىندەگى احۋالدى بەيبىت رەتتەۋگە باعىتتالعان بارلىق شارالاردى قولدايتىنىن ايتتى.
- قازىرگى جاعداي ەشكىمگە پايدا بەرمەيدى. بارلىق ەلدەرمەن دوستىق قاتىناستا ەكەنىمىزدى ەسكەرە وتىرىپ، ءبىز وسى ماسەلە جونىندە سىزبەن بىرلەسىپ جۇمىس ىستەي الامىز. ءبىز بەلگىلى ءبىر شەشىمگە كەلىپ، ادامداردىڭ وپات بولۋىن توقتاتۋعا سەپتىگىن تيگىزەتىن شارالار قابىلداۋ ءۇشىن ءىس- قيمىلدارىمىزدى ۇيلەستىرە الامىز دەپ ۇمىتتەنەمىن، - دەدى قازاقستان پرەزيدەنتى.
پ. پوروشەنكو ەكى مەملەكەتتىڭ ءوزارا ىقپالداستىعىنىڭ الەۋەتىن ساۋدا- ەكونوميكالىق، مادەني- گۋمانيتارلىق جانە باسقا دا نەگىزگى سالالاردا بەلسەندى تۇردە پايدالانۋ قاجەتتىگىنە توقتالدى.
- ەلدەرىمىز اراسىنداعى كەدەرگىنى جويۋعا ىقپال ەتەتىن ۇكىمەت ارالىق كوميسسيانىڭ جۇمىسىن باستاۋ قاجەت. سىزگە ۋكراينانىڭ ەگەمەندىگىن، اۋماقتىق تۇتاستىعى مەن تاۋەلسىزدىگىن قولداۋ تۇرعىسىنداعى بەرىك ءارى سىندارلى ۇستانىمىڭىز ءۇشىن العىس ايتامىن. بىزگە مينسكىدە قىسقاشا اڭگىمەلەسۋگە مۇمكىندىك تۋدى. جاسالعان مالىمدەمەلەر، ۋاعدالاستىقتار ناقتى كورىنىس تاۋىپ وتىر. ۋكراينا مۇنى جەتە باعالايدى، - دەدى ۋكراينا پرەزيدەنتى.