الماتىدا وتكەن الەم چەمپيوناتىندا جۇلدەنىڭ ءبارىن شەتەلدىكتەر الىپ كەتتى
چەمپيوناتتىڭ سالتاناتتى جابىلۋ ءراسىمى بارىسىندا الماتى قالاسى اكىمىنىڭ ورىنباسارى زاۋرەش امانجولوۆا سپورتشىلاردىڭ بارلىعىنا جارىستارعا قاتىسىپ، جاقسى ناتيجە كورسەتكەندەرىنە ريزاشىلىعىن ءبىلدىرىپ، ولاردى الداعى جاڭا جىلمەن قۇتتىقتاپ، سپورتتا جاڭا تابىستار تىلەدى. بۇدان كەيىن ارنايى كونسەرتتىك باعدارلاما باستالدى. سونىمەن قاتار، جينالعان قاۋىمعا مۇز ايدىنىندا تەگىن كونكي تەبۋگە رۇقسات بەرىلدى.
ايتا كەتەلىك، وسىمەن ەكىنشى رەت وتكىزىلىپ وتىرعان الەم بىرىنشىلىگىنە 15 ەلدەن بارلىعى 100 جۋىق سپورتشى قاتىستى.
سونداي-اق، بۇل كۇنى چەمپيوناتتىڭ ءتورتىنشى كۇنگى جارىستارىنىڭ قورىتىندىلارى شىعارىلدى.
سونىمەن، 500 مەترلىك قاشىقتىقتا قىزدار اراسىندا ءبىرىنشى ورىندى 77:90 سەكۋندتىق ناتيجەمەن رەسەيلىك يۋليا كوزىريەۆا جەڭىپ الدى. ەكىنشى ورىندى 78:82 سەكۋندتىق ناتيجەمەن رەسەيلىك ارينا ارشينوۆا يەلەندى. قازاقستاندىق ماريا سيزوۆا قولا مەدالگە قول جەتكىزدى.
بۇل جەردە ءبىر ايتا كەتەتىن ءجايت، 500 مەترلىك قاشىقتىق بويىنشا سپورتشىلار ەكى رەتتەن جارىسادى. وسىلايشا، جەڭىمپازدار ەكى ناتيجەنىڭ قوسىندىسى بويىنشا انىقتالادى.
ال وسى قاشىقتىقتا ەرلەر اراسىندا وتكەن جارىستا ءبىرىنشى ورىن يتاليالىق ميركو دجاكوۆا نەنزيگە بۇيىردى. ول بۇل قاشىقتىقتى 70.550 سەكۋندتا باسىپ ءوتتى. كۇمىس مەدال پولشالىق ارتۋر نوگالدىڭ ەنشىسىندە. ونىڭ كورسەتكىشى 70.740 سەكۋند. ال ءۇشىنشى ورىنعا 70.940 سەكۋندتىق ناتيجەمەن قىتايلىق تايبەيدىڭ سپورتشىسى چينگ يانگ سۋنگ كوتەرىلدى.
قازاقستاندىق سپورتشىلار فەدور مەزەنتسيەۆ (71.540 سەكۋند) پەن ارتۋر كريكۋنوۆ (72.450 سەكۋند) ءتورتىنشى جانە بەسىنشى ورىنعا جايعاستى. تاعى ءبىر قازاقستاندىق دارسيل ەسسامامبو 73.020 سەكۋندتىق ناتيجەمەن ونىنشى ورىندى مىسە تۇتتى.
اۆتور: جاپپاربەرگەن ايبوتا