الەم بىرىنشىلىگىندە توبەلەسكە تابەتىمنىڭ تارتقانى-اي - دامير رىسبايەۆ
«توبەلەسكىم كەلگەنى راس، سەبەبى، تورەشىلەر سان مارتە ادىلەتسىزدىك جاسادى. بۇل دۇرىس بولمادى. الەمدىك بىرىنشىلىك بولعان سوڭ ءادىل ءوتۋى ءتيىس ەدى. كوماندالاستارىڭدى رەنجىتىپ جاتقاندا قول قۋسىرىپ قاراپ وتىرا المايدى ەكەنسىڭ. دەگەنمەن، ءبىزدىڭ جىگىتتەر ءلام-ميم دەپ ءتىل قاتپاي، دۇرىس قىلدى. دورەكى ويناعاندارعا تەك گولمەن جاۋاپ قاتۋ كەرەك»، - دەيدى د. رىسبايەۆ.
حوككەيشىنىڭ ايتۋىنشا، باپكەرلەر شتابى كومانداعا ۆ توبىندا ءبىرىنشى ورىن يەلەنۋ مىندەتىن جۇكتەگەن، جىگىتتەر بۇل تاپسىرمانى ابىرويمەن اتقارىپ شىقتى. كوماندالاستارى رىسبايەۆتىڭ توبەلەسىن ۇنەمى ازىلگە اينالدىرىپ وتىراتىن كورىنەدى.
«العاشقى ماتچتا مەنى ەش سەبەپسىز الاڭنان قۋا بەردى. تورەشىلەردىڭ نەگە بۇيتكەندەرىن تۇسىنە المادىم، سويتسەم، تۋرنير قوجايىندارى مەنىڭ كىم ەكەنىمدى ولارعا ايتىپ قويعان ەكەن. ونى كەيىننەن ءبىلدىم»، - دەيدى رىسبايەۆ.
الايدا، ۇرداجىق قازاق جىگىتى الداعى ماتچتا ءوزىنىڭ بۇرىنعى قارسىلاسى الەكساندر سۆيتوۆپەن جاعا جىرتىسقىسى كەلمەيتىنىن دە جەتكىزدى.
«24 - جەلتوقساندا «اق بارىس» - قا قارسى ويىن وتكىزەمىز. الەكساندر سۆيتوۆ وتكەن جولعى توبەلەستەن كەيىن العان جاراقاتىنان ءالى جازىلا قويعان جوق شىعار. سوندىقتان، بۇل ويىندا توبەلەسپەيتىن شىعارمىن، بارىنشا ويىنعا كوڭىل بولەمىن»، - دەيدى «بارىس» ويىنشىسى.
ايتا كەتۋ كەرەك، قازاقستاننىڭ حوككەيدەن جاستار قۇراماسى (U-20) ۆەنگريادا وتكەن الەم چەمپيوناتىنىڭ ۆ توبىنداعى ءبىرىنشى ديۆيزيوندا جەڭىسكە جەتىپ، ا توبىنا جولداما الدى. ەندى استانالىق كوماندا 24 جەلتوقساندا كەشكى ساعات 19:00-دە «اق بارىس» - پەن وينايدى.