«ءبىزدىڭ سان عاسىرلىق تاريحىمىز بار. ونىڭ ءىزى بۇكىل قازاقستاننىڭ جەرىندە سايراپ جاتىر. جايىق بويىندا، ۇلىتاۋ ماڭىندا، تۇركىستان تورىندە قانشاما حاندارىمىز بەن سۇلتاندارىمىزدىڭ، اتا- بابالارىمىزدىڭ مايىتتەرى جاتىر. ءبىز سونىڭ ءبارىن كەزىندە وقىمادىق، بىلمەدىك. تاريحىمىز كەڭەس وداعىمەن باستالادى دەپ كەلدىك. ەندى ەگەمەندىگىمىزدى الىپ، ەسىمىزدى جينادىق، تاريحىمىزدى تۇگەندەيتىن كەز جەتتى. سونى ءبىز قازاق حاندىعىنىڭ 550 -جىلدىعىنان باستايىق دەپ وتىرمىز » ، - دەدى ن. نازاربايەۆ.
ونىڭ پىكىرىنشە، كەلەشەك ۇرپاق اياعىندا نىق تۇرۋى ءۇشىن، « بۇل ەلدىڭ، بۇل جەردىڭ انالارىمىزدىڭ كوز جاسى ارقىلى، اتالارىمىزدىڭ قاسىقتاي قانى مەن ماڭداي تەرى ارقىلى كەلگەنىن ءبىلۋى ءتيىس».
« قازاق جەرىنىڭ قاي تۇكپىرىنە بارساڭ دا، تىلىندە ءبىر ديالەكت جوق، سالتىندا ءبىر ايىرماشىلىق. بالانى الديلەۋىندە دە وزگەشەلىك جوق، تويىندا دا ەرەكشەلىك جوق. قازاق ەشقاشان بولىنگەن ەمەس. قازاقتىڭ بارلىق تاريحى - بىرىگۋ، بىرگە بولۋ. ءۇش ءجۇزدىڭ بالاسى جينالىپ، اسكەر قۇرىپ، سوعىسقا شىققان كەزدە، ەشبىر جاۋ توتەپ بەرە العان جوق. ءبىزدى ءبولىپ- جارىپ قانا جەڭە العان. وسىنى ەستە ساقتاۋ كەرەك. اللانىڭ بەرگەن، اتا- بابامىزدىڭ تىلەگىمەن كەلگەن تاۋەلسىزدىكتى ساقتاپ قالۋ ءۇشىن قازاق ءوز ىشىندەگى الاۋىزدىقتان قۇتىلۋ كەرەك. تۇبىندە ول بىزگە قاۋىپ ءتوندىرۋى مۇمكىن. ءبىزدىڭ اتا- بابامىز بەرگەن وسىناۋ كەڭ- بايتاق جەرىن، مەملەكەتتىلىگىن قولىمىزدان شىعارىپ الۋ - ءومىر باقي كۇنا بولىپ سانالادى. «تورتەۋ تۇگەل بولسا، توبەدەگىنى الادى. التاۋ الا بولسا، اۋىزداعىدان ايىرىلادى» دەگەن قازاقتىڭ ءسوزى بار » ، - دەپ ءتۇيدى ەلباسى.