ن. نازاربايەۆ: «نۇرلى جول» باعدارلاماسىنداعى جوبالار ۇرپاقتان- ۇرپاققا جالعاساتىن بولادى
ەلباسى سۇحبات بارىسىندا «نۇرلى جول - بولاشاققا باستار جول» جولداۋىنداعى جاڭا ەكونوميكالىق ساياسات ماسەلەرىنە توقتالا كەلە، كولىك ينفراقۇرىلىمى دامىتۋداعى باسىمدىقتارعا دا نازار بۇردى.
بۇل رەتتە مەملەكەت باسشىسى رەسپۋبليكامىزدا تەمىرجولداردىڭ باسىم بولىگى سولتۇستىككە، رەسەيگە قاراي سالىنعانىن، ال ەل ىشىندە ەشقانداي جولداردىڭ بولماعانىن اتاپ ءوتتى. «ءبىز قوستانايدان اقتوبەگە دەيىن 300 شاقىرىم جول سالدىق. نەگە؟ سەبەبى، قوستانايدان اقتوبەگە كەلۋ ءۇشىن ءۇش رەت رەسەيگە كىرىپ، ەكى رەت شەكارالىق تەكسەرۋدەن ءوتۋ كەرەك بولاتىن. سوندىقتان قانشا قيىن بولسا دا ءبىز سولاي اكەلدىك، ال ناتيجەسىندە جول بويىندا اۋىلدار، مەكەمەلەر پايدا بولدى، قوزعالىس جانداندى»، - دەپ تۇسىندىرگەن پرەزيدەنت شاردان وسكەمەنگە قاراي سالىنعانىن تەمىرجولدىڭ دا يگىلىككە تولى ەكەنىن جەتكىزدى.
«بۇل عانا ەمەس، وڭتۇستىكتى الىپ قارايىق: ءبىر كەزدەرى جەتىسايدان، وزبەك اعايىنداردىڭ ىشىنەن شىمكەنتكە كەلە الماي قالدىق قوي. الدىمەن وزبەكستانعا كىرىپ، سوسىن سول ارقىلى كەلەتىنبىز. سوندىقتان دا، شاردارانىڭ ۇستىنەن كوپىر سالۋعا تۋرا كەلدى. بۇنىمەن قوسا، كوكساراي سۋ قويماسىن سالدىق، جىلدا قىزىلوردانى سۋ باسۋ قاۋپى تۋاتىن ەدى، سۋ قويماسى ارقىلى بۇل پروبلەما شەشىمىن تاپتى. ال كەيىنگى، قورعاستان جەتىگەنگە، ارقالىقتان جەزقازعانعا، جەزقازعاننان بەينەۋگە دەيىن 1500 شاقىرىمدى بىتىردىك. وسى ارقىلى قازاقستاندا ءبىز ىشكى تەمىرجول جەلىسىن اياقتادىق. ياعني، ءبىز تەمىرجول جەلىلەرىن قازاقستاندا تولىعىمەن قامتىپ وتىرمىز دەپ ايتۋعا بولادى»، - دەدى ن. نازاربايەۆ.
ەلباسىنىڭ ايتۋىنشا، «نۇرلى جول» جولداۋىندا ايقىندالعان كولىك جەلىلەرى - بۇل ەكونوميكانىڭ كۇرەتامىرى، وڭىرلەردىڭ ورتالىقپەن، وبلىستاردىڭ ءبىر- بىرىمەن ءوزارا بايلانىسى. وسىعان وراي، پرەزيدەنت ەگەر ىشكى ەكونوميكا دامىپ، وتاندىق بيزنەس قازاقستاننىڭ وزىنە كەرەكتى تاۋارلارىن شىعارسا، بۇل كەلەشەكتەگى داعدارىسقا جاۋاپ بولاتىنىن جەتكىزدى.
«نۇرلى جول» تەك قانا تەمىرجولدار مەن اۆتوكولىك جولداردى عانا ەمەس، ەلەكتر جەلىلەرىن دە قامتيدى. بۇل رەتتە جاڭا ەلەكتر ستانسالارى سالىنباق. بۇدان بولەك، تۇرعىن ءۇي قۇرىلىسى، تۇرعىن ءۇي- كوممۋنالدىق شارۋاشىلىعى داميدى. ءبىر سوزبەن ايتقاندا ءبىز 2007-2009 - جىلدارداعى داعدارىستا تاجىريبە جيناقتادىق. بۇكىل الەم مويىنداپ، جاقسى دەپ باعالاعان داعدارىسقا قارسى باعدارلاما بىزدە بولدى. ءبىز بۇل جولى سول تاجىريبەنى پايدالانىپ قانا قويماي، ونى تولىقتىردىق. ماسەلەن، شاعىن جانە ورتا بيزنەستى الىپ قاراڭىز. جۇمىس ورنىن اشاتىندار سولار. سوندىقتان دا، «نۇرلى جول» باعدارلاماسى بۇل بۇرىننان ويدا جۇرگەن، سوسىن بىرنەشە ۇرپاقتار بويى جالعاساتىن جوبا.
ماسەلەن، بۇگىنگى كۇنى ءبىزدىڭ وسى باعدارلاما اياسىندا سالعان نىساندارىمىزدا بالالارىمىز عانا ەمەس، نەمەرەلەرىمىز دە جۇمىس ىستەيتىن بولادى. سوندىقتان «نۇرلى جولدىڭ» ەلگە بەرەر يگىلىگى كوپ. ءبىز 15 جىلدىڭ ىشىندە قور جينادىق. ال وسى قوردى مىناداي داعدارىستى كەزەڭدە حالىقتىڭ جاعدايىن تومەندەتپەۋ ءۇشىن قولدانباساق، قاشان جۇمسايمىز. ءبىز وسى باعىتتا ونداعان زاۋىتتار سالامىز. سونىڭ ىشىندە اۋىل شارۋاشىلىعى تاۋارلارىن وڭدەۋ باعىتى ەرەكشە. ەندەشە، بارشا حالىق وسى «نۇرلى جول» باعدارلاماسىندا قامتىلعانداردى ورىنداۋعا جۇمىلۋىمىز كەرەك. ناتيجەسىندە مەن كوپتەگەن جۇمىس ورىندارىنىڭ اشىلاتىنىنا، جاڭا تاۋارلار شىعارىلاتىنىنا، وسى ارقىلى ءبىزدىڭ مىدەتتەرىمىز ورىندالاتىنىنا سەنەمىن»، - دەدى ن. نازاربايەۆ.