جول پوليتسەيلەرىنىڭ اتاۋى قايتا وزگەرتىلدى
ىشكى ىستەر مينيسترلىگى قۇرىلىمدىق ءبولىم جۇمىسىنىڭ ماڭىزىن ارتتىرۋعا وسى اتاۋ جاقىن دەپ تاۋىپتى.
ال قاتارداعى جۇرگىزۋشىلەر جول پاترۋلدىك قىزمەتىن قالاي اتاساڭ دا، ودان جۇمىس ساپاسى وزگەرمەيدى دەپ ەسەپتەيدى. قىرعىزستان ىشكى ىستەر مينيسترلىگىنە قاراستى قۇرىلىمدىق جۇيە بۇعان دەيىن 2 رەت اتاۋىن وزگەرتىپ ۇلگەردى.
الدىمەن مەملەكەتتىك جول قوزعالىسى قاۋىپسىزدىگى باسقارماسى، ودان كەيىن جول-پاترۋلدىك قىزمەتى دەپ اتالدى. ءبىراق ەكەۋى دە جول ساقشىلارىنىڭ جۇمىسىن ءدال سيپاتتاپ بەرە المايدى دەگەن ماماندار ەندى ەسكى اتاۋدى قايتارۋدى ءجون ساناپ وتىر.
سەرگەي دياچەنكو، قىرعىز رەسپۋبليكاسى ءى ى م ج پ ق باسشىسى:
- مەملەكەتتىك اۆتوموبيل قىزمەتى جولدار مەن كوشەلەردەگى كولىكتەر قوزعالىسىن باقىلاپ قانا قويمايدى. بۇل قۇرىلىمعا تەحنيكالىق باقىلاۋ، جول قوزعالىسىن ۇيىمداستىرۋ، سول سياقتى تاعى ءبىر ماڭىزدى قىزمەت - ستاتيستيكالىق ەسەپكە الۋ مەن ساراپتاما جاساۋ دا جۇكتەلەدى. مينيسترلىك اتاۋدى وزگەرتۋ جايىنداعى ۇسىنىستارىن ۇكىمەتكە جولداپتى. ەگەر شەشىم قابىلدانسا، مەملەكەتتىك اۆتوينسپەكسياعا بۇرىنعى كوپتەگەن قىزمەتتەرى قايتارىلادى. وسىدان بىرنەشە جىل بۇرىن جول ينسپەكتورلارى الدىمەن كولىكتەردى تىركەۋ، كەيىنىرەك جەكەمەنشىك كولىكتەردى تەحنيكالىق بايقاۋدان وتكىزۋ قۇقىقتارىنان ايىرىلعان ەدى. وسىلايشا جول پاترۋلدىك قىزمەتى تىكەلەي قارجى تۇسىمدەرىنەن قاعىلعان بولاتىن. ال جۇرگىزۋشىلەر ينسپەكتورلاردىڭ اتاۋى وزگەرگەنىمەن، قىزمەت ساپاسى جاقساراتىنىنا كۇمانمەن قاراپ وتىر.
يگور ساپوجنيكوۆ، اۆتوكولىك يەسى - قوسىلعىشتاردىڭ ورنىن اۋىستىرعانمەن، قوسىندى وزگەرمەيتىنى بەلگىلى. ەڭ باستىسى، حالىق ءۇشىن ادال قىزمەت ەتسە، بىزگە كەرەگى سول. دەگەنمەن م ا ي اتاۋى مۇمكىن تىلگە جاتىق ءارى تۇسىنىكتى بولاتىن شىعار. ميليتسياداعى شەنەۋنىكتەردىڭ ايتۋىنشا، حالىق اۋزىندا ۇيرەنگەن اتاۋ - م ا ي. سوندىقتان ەندىگى ماقسات - ساقشىلاردىڭ ەل الدىنداعى ابىرويىن كوتەرىپ، سەنىمدى قايتارۋ.
24.kz