پۋتين جەكە ومىرىنە قاتىستى جۋرناليستەردىڭ سۇراعىنا جاۋاپ بەردى
«بارلىعى جاقسى. الاڭداۋدىڭ قاجەتى جوق. ەۋروپادا مەنىڭ ءبىر دوسىم بار، ۇلكەن باستىق، سول تاياۋدا مەنەن «ماحابباتىڭ بار ما؟» دەپ سۇرادى. مەن «نەنى مەڭزەپ تۇرسىڭ؟» دەپ سۇراسام، «سەن بىرەۋدى سۇيەسىڭ بە؟» دەيدى. «ءيا» دەپ جاۋاپ بەرسەم، «سەنى بىرەۋ سۇيە مە؟» دەگەن سۇراق قويادى.
مەن «ارينە» دەسەم، «ە، وندا قۇدايعا شۇكىر» دەيدى. بارلىعى جاقسى. ال ليۋدميلا الەكساندروۆنامەن جاقسى قارىم-قاتىناستامىز. ءجيى ارالاسامىز، بالالارىممەن وتە ءجيى بولماسا دا كورىسىپ تۇرامىز»، - دەپ جاۋاپ بەردى ۆلاديمير پۋتين. الايدا ول ءوزىنىڭ سۇيەتىن ادامى جانە ءوزىن سۇيەتىن ادامنىڭ كىم ەكەنىنە ناقتى توقتالعان جوق.
ەستەرىڭىزگە سالا كەتەيىك، 2013 - جىلدىڭ ماۋسىمىندا رەسەي پرەزيدەنتى ۆلاديمير پۋتين مەن ايەلى اجىراساتىندارىن ءدۇيىم جۇرتقا ءمالىم ەتكەن بولاتىن. سول كەزدە «بۇل شىنىمەن ءبىزدىڭ ورتاق شەشىمىمىز بولدى. جانە ءبىزدىڭ نەكەمىز وسىلاي اياقتالىپ وتىر. سەبەبى ءبىز مۇلدە كورىسپەيمىز دەسە دە بولادى. ۆلاديمير ۆلاديميروۆيچ جۇمىسباستى ادام، ال قىزدارىمىز بوي جەتتى. ءارقايسىمىزدىڭ جەكە-جەكە ءوز ءومىرىمىز بار. مەن شىنىمەن كوپشىلىك الدىنا شىعا بەرگەندى ۇناتپايمىن»، - دەدى ليۋدميلا پۋتينا.
پۋتيندەر جۇبى نەكەگە 1983 - جىلى 28 - شىلدەدە وتىرعان بولاتىن. سول ۋاقىتتان بەرى ولار بىرگە 30 جىل ءومىر سۇرگەن. ەكى قىزى بار - ءبىرىنشى قىزى ماريا 1985 - جىلى جانە ەكىنشىسى - ەكاتەرينا 1986 - جىلى دۇنيەگە كەلگەن.
سوڭعى جىلدارى ۆلاديمير پۋتين كوپشىلىك الدىنا ايەلىمەن بىرگە سيرەك شىعاتىن، سوڭىرا پرەزيدەنت پەن ايەلىنىڭ اراسى تىم سۋىپ كەتكەن دەگەن الىپ-قاشپا اڭگىمەلەر دە ەل اراسىندا جەلدەي ەسىپ ءجۇردى.
2007 - جىلى ريمدە وتكەن باسپا ءسوز ماجىلىسىندە وسى تاقىرىپ توڭىرەگىندە اشىق سۇراعاندار دا بولدى. ول كەزدە تىلشىلەردىڭ بىرەۋى ونىڭ ليۋدميلا پۋتينامەن اجىراسىپ، وليمپيادا چەمپيونى، گيمناستشى قىز الينا كابايەۆامەن جاقىن ارادا تۇرمىس قۇرادى دەگەن قاۋەسەتتىڭ راس-وتىرىگىن انىقتاپ بەرۋدى وتىنگەن بولاتىن. الايدا، پۋتين ول جولى بۇل قاۋەسەتتىڭ ىشىندە شىندىققا جاناساتىن بىردە-ءبىر ءسوز جوق ەكەنىن باسا ايتقان ەدى.