ەلباسى ق ر س ءى م باسشىسىنا رەسەي مەن باتىس ەلدەرى اراسىنداعى قارىم-قاتىناسقا بايلانىستى حالىقارالىق احۋالدى سارالاپ وتىرۋدى تاپسىردى
كەزدەسۋ بارىسىندا ە. ىدىرىسوۆ مەملەكەت باسشىسىنا حالىقارالىق ىستەرگە قاتىستى جىل قورىتىندىسىن باياندادى.
قازاقستان پرەزيدەنتى 2014-جىلدىڭ حالىقارالىق شارالار كەستەسى تىعىز بولعانىنا توقتالدى.
- كەزدەسۋلەر مەن ءىس-شارالاردىڭ كوپ بولۋىنىڭ ارقاسىندا وزگە ەلدەردىڭ قازاقستانعا دەگەن قىزىعۋشىلىقتارى ارتىپ، ولارمەن ءوزارا ءتيىمدى ىنتىماقتاستىق دامىپ كەلەدى. ءبىز قابىلداپ جاتقان ءىس-قيمىلداردى الەمدىك قوعامداستىق قولدايدى. قازىرگىدەي جاعدايدا حالىقارالىق احۋالدى رەسەي مەن باتىس ەلدەرى اراسىنداعى قارىم-قاتىناستاردىڭ ءوربۋى مەن جاھاندىق ەكونوميكاداعى ترەندتەر اياسىندا ۇنەمى سارالاپ وتىرۋ قاجەت، - دەدى مەملەكەت باسشىسى.
سىرتقى ىستەر ءمينيسترى قازاقستان پرەزيدەنتىنىڭ باستامالارىنا شەتەلدەر تاراپىنان قولداۋ كورسەتىلىپ وتىرعانىنا توقتالدى.
- ءسىز جاريالاعان «نۇرلى جول» ساياساتى الەمدە جوعارى باعالانىپ وتىر. ول قازىرگىدەي كۇردەلى جاعدايدا قازاقستاننىڭ تۇراقتى ءارى ورنىقتى دامۋىن قامتاماسىز ەتەتىن جاقسى باعدارلاما رەتىندە قابىلدانۋدا. ءبىزدىڭ مىندەتىمىز سونى ەلدىڭ سىرتقى ساياساتىنىڭ وزگە دە باسىم باعىتتارىمەن بىرگە ناقتىلى جۇزەگە اسىرۋ بولىپ سانالادى، - دەدى ە. ىدىرىسوۆ.
كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.