پاريج ساحناسىندا قازاقتىڭ كۇيى كۇمبىرلەدى

استانا. قازاقپارات - قازاقستاننىڭ ونەر مايتالماندارى پاريج ساحناسىندا شەبەرلىك تانىتتى. فرانسياداعى يۋنەسكونىڭ شتاب پاتەرىندە ءدينا نۇرپەيىسوۆا اتىنداعى حالىقتىق مۋزىكا اكادەمياسىنىڭ كونسەرتى جوعارى دەڭگەيدە ءوتتى.

وتكەن ايدا عانا قازاقتىڭ كۇيى ادامزاتتىڭ ماتەريالدىق ەمەس مۇراسى تىزىمىنە ەنگەنى بەلگىلى. سول سەبەپتى دە مۋزىكانتتار نەگىزگى باسىمدىلىقتى ۇلتتىق ونەرىمىزگە جاسادى.

بايىرعى كوشپەندىلەردىڭ اۋەزدى ءانى مەن كۇمبىرلەگەن كۇيى ءدۇيىم جۇرتتى تاعى ءبىر مارتە تاڭ قالدىردى.

كۇللى قازاق حالقىنىڭ جاۋھار تاستى جىرلارىن تانىتقان قۇرمانعازى، تاتتىمبەت، لاتيف حاميدي مەن نۇرعيسا تىلەنديەۆتىڭ كۇيلەرى پاريج ساحناسىن سىلتىدەي تىندىردى.

«قازاق تۋىندىسى - ەۋروپالىق مۋزىكادان الدەقايدا ەرەكشە. 1928- جىلى قازاق حالقىنىڭ دارىندى ءانشىسى امىرە قاشاۋبايەۆ پاريجدە فرانسۋز حالقىنىڭ زور ىقىلاسىنا بولەنگەنىن ءبارىمىز بىلەمىز. بۇگىنگى كونسەرتتە دە قازاقتىڭ ايتۋلى اندەرى شىرقالدى»، - دەپ اتاپ ءوتتى د. نۇرپەيىسوۆا اتىنداعى اكادەميالىق قازاق حالىق اسپاپتار وركەسترىنىڭ باس ديريجەرى وراق جاۋىروۆ.

اتىراۋ ارتىستەرى اراعا ءبىر عاسىر سالىپ، فرانسياداعى تىڭدارمانىن تاعى ءبىر تامساندىردى. مارجان تورەحانوۆانىڭ ورىنداۋىنداعى تۋىندى جيىلعان حالىقتىڭ قوشەمەتىنە بولەنىپ، زالدان «براۆو» دەگەن جىلى لەبىزدەر ەستىلدى. قازاقتىڭ انىندەي ەرەكشە ءۇن يۋنەسكونىڭ شتاب- پاتەرىندە بۇرىن-سوڭدى ەستىلمەگەن.

الايدا مۇنداعى كورەرمەننىڭ تالعامى بيىك ءارى ءار حالىقتىڭ ونەرىن تىڭداۋ قالىپتى دۇنيەگە اينالعان. دەگەنمەن، قازاقتىڭ ۇلتتىق مۋزىكاسى ەشبىر ادامدى بەي-جاي قالدىرمادى.

UNESCO باس ديرەكتورىنىڭ ورىنباسارى پەرەس دە ارمينيان:

- مۋزىكا وتە شەبەر ورىندالدى. قازاقتىڭ كۇيى ادامزات مۇراعاتىنىڭ ماتەريالدىق ەمەس مادەني مۇراسى تىزىمىنە ەنگىزىلگەنى ءمالىم. ويتكەنى، ول ─ ءتىرى تاريح، ءداستۇردىڭ جالعاسى. ۇلت بولمىسىن تانىتىپ، اشاتىن بىردەن- ءبىر ونەر تۋىندىسى.

ساحنا تورىندە مەيىر بايىشيەۆ، اقمارال نوعايبايەۆا، ەلميرا يمانبايەۆا، قايرات قايمان جانە ەللا قۇرتيەۆا سىندى دارىندى ونەرپازدار ءوز شەبەرلىكتەرىن ورتاعا سالدى. ساحنادا ورىندالعان ءاربىر تۋىندى كورەرمەن تاراپىنان ۇلكەن ىقىلاسقا بولەنىپ جاتتى.

ورتالىق ازيانىڭ ادامزات پروگرەسس قورىنىڭ وكىلى، رەنە كانيا:

- دومبىرا - مەنىڭ ۇلكەن ماحابباتىمدى وياتقان اسپاپ. دومبىرا مەن ءۇشىن جۇماقتىڭ ءۇنى سياقتى. قوبىزدى دا ەرەكشە جاقسى كورەم، الايدا دومبىرا داۋسىن ەستىگەندە جۇرەگىم اتتاي تۋلايدى. بۇگىنگى كەش كەرەمەت ءوتتى، وركەستر، ونەر مايتالماندارى تۋىندىنى شىن جۇرەگىمەن ورىندادى. كەرەمەت اسەرگە بولەدى.

«حابار» تەلەارناسى