شىمكەنتتىك سپورتشىلار قالاداعى ەڭ بيىك نۇكتەنى باعىندىردى - كەسكىن، فوتو
08:41, 17 - جەلتوقسان 2014
شىمكەنت. قازاقپارات - تاۋەلسىزدىك كۇنى شىمكەنتتە وقۋشىلار كونسەرت ۇيىمداستىرسا، جاس سپورتشىلار جاپپاي جۇگىرۋدەن سايىسقا ءتۇستى.
وڭتۇستىك قازاقستاندىق سپورتشىلار تاۋەلسىزدىك كۇنىن جاپپاي جۇگىرۋمەن اتاپ ءوتتى.
ولار شىمكەنتتەگى ەڭ بيىك نۇكتەنى - بايدىبەك بيگە ارنالعان ەسكەرتكىشتى باعىندىردى. اتلەتتەر مونۋمەنتكە اپاراتىن 700 مەترلىك باسپالداقپەن جۇگىرىپ ءوتتى.
«جارىس وتە قىزىقتى ءارى قيىن بولدى. مەن بياتلونمەن اينالىسامىن، سونىڭ وزىندە ماعان بۇل سايىس وڭايعا تۇسكەن جوق، باسەكەلەستەر كوپ بولدى»، - دەيدى سپورتشى قىز الينا بايمەنوۆا.
ال تاۋەلسىزدىك سارايىندا بەلگىلى شىمكەنتتىك ورىنداۋشىلار مەن شىعارماشىلىق ۇجىمدار قاتىسقان مەرەكەلىك كونتسەرت جۇرتشىلىققا كوتەرىڭكى كوڭىل-كۇي سىيلادى. ءدال وسى كۇنى ءال-فارابي اتىنداعى الاڭدا قالالىقتار ءۇشىن تومەن باعامەن ازىق-تۇلىك جارمەڭكەسى ۇيىمداستىرىلدى.