قاسيەتتى تاۋەلسىزدىك مەرەكەسى ءبارىمىز ءۇشىن دە ىستىق - وزگۇر دەميرال

ورال. قازاقپارات - قاسيەتتى تاۋەلسىزدىك مەرەكەسى قارسانىڭدا باۋىرلاس قازاقتىڭ ۇل- قىزدارى سەكىلدى مەنىڭ دە بويىمدى ايرىقشا تولقىنىس پەن ماقتانىش سەزىمى بيلەيدى.

بۇل تۋرالى «كاريزما» كومپانيالار توبىنىڭ باسشىسى وزگۇر دەميرال ءمالىم ەتتى.

- ءتۇبى ءبىر تۇركى جۇرتى رەتىندە قازاق ەلى تاۋەلسىزدىك العاندا قاتتى قۋاندىق، - دەدى ول. - ءالى ەسىمدە، وسىدان 23 جىل بۇرىن تۇنگى ساعات 3 تە تۇركيانىڭ سول كەزدەگى پرەزيدەنتى تۇرعىت ءوزالدىڭ قازاقستان ەلىن، ەلباسىن ءاز تاۋەلسىزدىگىمەن قۇتتىقتاعانىن تەلەديداردان تىڭداعانبىز. بۇعان دەيىن قازاقستان دەگەن ەل بار ەكەنىن بىلمەيتىنبىز، ويتكەنى 15 وداقتاس رەسپۋبليكانىڭ بارلىعى دا ءبىر ەل رەسەي دەپ بىلەتىنبىز.

تاۋەلسىزدىك ءسوزى قازاق حالقىنا قانشالىقتى ىستىق بولسا، ماعان دا سولاي دەسەم جالعان ايتپاعان بولارمىن. ويتكەنى مەن قازاقستان العاش تاۋەلسىزدىك العان جىلدارى وسى ەلدە جوعارى ءبىلىم الىپ، كاسىپكەر رەتىندە قالىپتاستىم. قازاقستان ەگەمەن ەل بولماسا، قاي جاقتا جۇرەرىمدى كىم بىلگەن.. . وزگە ەلدىڭ ازاماتى بولسام دا، جاس مەملەكەتتىڭ جاس بالاداي اياعىن ءتاي- ءتاي باسىپ، قانداي قيىنشىلىقتاردان قايىسپاي وتكەنىن جاقسى بىلەمىن. مەملەكەتتىك ءتىلدى دامىتۋداعى، ءبىلىم بەرۋ، دەنساۋلىق جانە وزگە دە سالالارداعى جاقسى وزگەرىستەردى گازەت- جۋرنالدان وقىعان جوقپىن، ءوز كوزىممەن كورىپ كەلەمىن. سۇيسىنەتىنىم دە راس.

2012 - جىلى ورالدا پلاستيكالىق ەسىك- تەرەزە شىعاراتىن شاعىن سەح اشىپ، 80 ادامدى جۇمىسپەن قامتىدىق. سودان بەرگى تاۋەلسىزدىك جىلدارى ىشىندە ەكىنشى جيھاز فابريكاسىن اشىپ، جۇمىسشىلار سانىن ءۇش ەسەگە وسىردىك. قازىر وبلىستاعى فيليالدا 240 شاقتى جۇمىسشىعا تۇراقتى جۇمىس بەرىپ وتىرمىز. كاسىپكەر رەتىندە ءوندىرىس ورىندارىن اشىپ، ونى دامىتۋىما شاعىن جانە ورتا بيزنەستى دامىتۋداعى ەلباسى مەن مەملەكەتتىڭ كومەك- قامقورلىعىنىڭ سەپتىگى ءتيدى. الداعى جىلدارى قازاقستاننىڭ دامۋ قارقىنىنا قارقىن قوسىلىپ، ەكونوميكاسى دامىعان مىقتى ەلدەردىڭ قاتارىنان ورىن الاتىنىنا سەنەمىن.

 ءبىر ءافسانادا كىشكەنتاي قۇمىرسقا تىرباڭداپ تاۋعا ورمەلەپ بارا جاتادى. وعان دوستارى «مىنا كۇشىڭمەن قالاي جەتەسىڭ تاۋ باسىنا؟ » دەسەدى مىسقىلداپ، سوندا ول: «ول جەرگە جەتە الماسام دا، سونىڭ جولىندا ولەمىن»، - دەيدى. قانداي تاماشا ءسوز! تۇرىكتەر: «جوق دەمەڭىز، جوعالاسىز» دەيدى. ءاربىر ازامات «الما ءپىس، اۋزىما ءتۇس» دەمەي، الدىنا ماقسات قويىپ، قيمىلداپ، ەڭبەكتەنسە دەيمىز. شۇكىر، قازاق جەرى باي، شۇرايلى، زاڭ بار، ەڭبەك ەتىپ، نانىڭدى ادال جەۋگە جاعداي جاسالعان. تەك سالىق تولەپ، جۇمىس ىستە. سودان سوڭ مەملەكەتتىڭ دامۋى ءۇشىن قوعامدا بىرلىك بولسىن. ايتايىن دەگەنىم، ەلىمىزدىڭ ازاماتتارى ءوز وتانىندا وندىرىلگەن ونىمدەردى تاڭداپ، السا ەكەن دەيمىن. سوندا ەلدە سالىق تۇسىمدەرى ءوسىپ، جاڭا جۇمىس ورىندارى اشىلادى، قارجى- قاراجات ءوز ەلىمىزدە قالادى. ناتيجەسىندە ەل داميدى، كوركەيەدى.

«قازاق ەلى ماڭگىلىك ەل بولسىن، ۇلىق مەرەكە بارلىق قازاقستاندىقتى جاڭا ىستەرگە قاناتتاندىرىپ، بويلارىنا قۋات بەرسىن دەيمىن!» ، - دەپ تۇيىندەدى ول ءسوزىن.

اۆتور: ەلجان ەرالى