قازاق ءتىلىن گوگول اۋدارما جۇيەسىنە قوسۋىمىز تاۋەلسىزدىك كۇنىنە ارنالعان تارتۋ - راۋان كەنجەحان ۇلى
بۇل - ءبىزدىڭ قورىمىزدىڭ قازاقستاننىڭ تاۋەلسىزدىك كۇنىنە جاساعان سىيلىعى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە «Wikibilim» قوعامدىق قورىنىڭ جەتەكشىسى راۋان كەنجەحان ۇلى ايتتى.
ايتا كەتەيىك، قازاق ءتىلىن Google اۋدارما جۇيەسىنە قوسۋ جوباسىن «Wikibilim» قوعامدىق قورى «Beeline قازاقستان» كومپانياسىنىڭ قولداۋىمەن جۇزەگە اسىردى.
«قازاق ءتىلىنىڭ Google اۋدارما جۇيەسىنە قوسىلۋى جۇيەدە بار 90 ءتىلدىڭ اراسىندا سوزدەردى، ءسوز تىركەستەرىن، ماتىندەردى جانە تۇتاستاي ۆەب- پاراقشالاردى ءبىر مەزەتتە ءارى تەگىن اۋدارۋعا مۇمكىندىك بەرەدى. بۇل جۇزدەگەن ەرىكتىلەر مەن انا ءتىلى ءۇشىن جەكە ۋاقىتى، كۇشى مەن ءبىلىمىن اياماعان شىن پاتريوتتاردىڭ ەكى جىلدىق جۇمىسىنىڭ ناتيجەسى. تەحنولوگيالىق جاعىنان اسا كۇردەلى بۇل لينگۆيستيكالىق پلاتفورماعا كىرە العان نەبارى 90 عانا ءتىل بار، بۇلار سول تىلدە سويلەيتىن تەگەۋرىندى ورتاسى بار، ىزدەۋشىسى مەن جاناشىرى بار تىلدەر. اتالعان پلاتفورما بولاشاقتان ءۇمىتتى تىلدەردىڭ كۇرەس الاڭى»، - دەپ اتاپ ءوتتى ر. كەنجەحان ۇلى.
ونىڭ ايتۋىنشا، «Beeline قازاقستان» كومپانياسى بۇل جوبانى 2012 - جىلدان بەرى قولداپ كەلەدى. سەرىكتەستىك اياسىندا كومپانيا موبيلدى جانە «ۇيدەگى ينتەرنەت» قىزمەتىن پايدالاناتىندارعا Google Translate- كە جانە اۋدارماشىنىڭ ارنايى پاراقشاسىنا تەگىن كىرۋگە مۇمكىندىك بەردى. سونداي- اق كومپانيا ەلىمىزدىڭ جوعارى وقۋ ورىندارىندا جوباعا قالاي ۇلەس قوسۋعا بولاتىندىعى تۋرالى ستۋدەنتتەرگە ارنالعان كەزدەسۋلەر ۇيىمداستىردى. قور تاراپىنان بىلىكتى اۋدارماشىلاردى جوباعا تارتۋ ماقساتىندا گرانت تا ءبولىندى.
قور جەتەكشىسىنىڭ ايتۋىنشا، Google اۋدارماشىنىڭ اۋدارما جۇيەسى ستاتيستيكالىق الگوريتمگە نەگىزدەلگەن، ياعني ماشينانىڭ جادىندا ءار ءسوز بەن ءسوز تىركەسىنىڭ اۋدارما نۇسقالارى نەعۇرلىم كوپ بولسا، اۋدارما ساپاسى سوعۇرلىم جاقسى بولا بەرمەك. سوندىقتان اۋدارما جۇيەسى ءوزىن- ءوزى جەتىلدىرۋگە باپتالعان، ال قولدانۋشىلار اۋدارمالاردىڭ ساپاسىن جاقسارتۋعا ۇلەس قوسۋ مۇمكىندىگىنە يە.
«اۋدارما ساپاسىن جاقسارتۋعا ۇلەس قوسۋعا نيەتتى كەز كەلگەن ادام قاتەنى بايقاسا، قارىنداش سۋرەتىن باسۋ ارقىلى تۇزەتۋ ەنگىزىپ، «اۋدارمانى جاقسارتۋ» دەگەن باتىرمانى باسا الادى»، - دەپ اتاپ ءوتتى قور جەتەكشىسى.
اۆتور: ءابۋ- اسقار مەكەش ۇلى