استانادا «جۇلدىزدار دا ايتىسادى» اتتى ەرەكشە شوۋ- ايتىس ءوتتى- فوتو
قازاقستان رەسپۋبليكاسىنىڭ تاۋەلسىزدىك كۇنىنە وراي استانا قالاسىنىڭ مادەنيەت باسقارماسىنىڭ ۇيتقى بولۋىمەن وتكىزىلىپ وتىرعان شوۋ- ايتىسقا ەسترادانىڭ ەلگە تانىمال جارىق جۇلدىزدارى مەن ازۋلى ايتىس اقىندارى قاتىستى.
شوۋ- ايتىستى ۇيىمداستىرۋشىلار ءداستۇرلى ايتىس ونەرىن وسى ارقىلى جاستار اراسىنا، قوعامعا كەڭىنەن ناسيحاتتاپ، كيەلى ونەردىڭ قاي زاماندا بولماسىن ۇيلەسىم تۋىپ، ءتۇرلى ارتىقشىلىقتارىمەن جۇرتتىڭ ەرەكشە ىقىلاسىنا بولەنە بەرەتىنىن دالەلدەۋدى ماقسات ەتكەن. ەرەكشە ايتىستى باعالاۋشى قازىلار قۇرامى دا بۇرىنعىدان وزگەشە بولدى. باس قازى ايتىستىڭ كوشىن باستاعان ءجۇرسىن ەرمان بولسا، قازىلار قۇرامىندا قوعام قايراتكەرى بەكبولات تىلەۋحان، ايتىسكەر اقىن مۇحامەدجان تازابەكوۆ، تەاتر جانە كينو اكتەرى ەرىك جولجاقسىنوۆ، جۇرگىزۋشى جاناتبەك بايتەكوۆ، «حابار» ارناسىنىڭ باس پروديۋسەرى رينات دۋمان ۇلى بولدى.
ساحاناعا ايتىسكەر اقىن ديدار قاميەۆ پەن ءانشى جازيرا بايىربەكوۆا، بالعىنبەك يماشيەۆ پەن جانار ايجانوۆا، سەرىكزات دۇيسەنعازين مەن روزا ءالقوجا، اينۇر تۇرسىنبايەۆا مەن ۇلىقپان جولداسوۆ، سارا توقتامىسوۆا مەن قانات ءالجاپپاروۆ، سىرىم اۋەزحان مەن ينديرا راسىلحان قاتارلى اقىندار مەن انشىلەر جۇپتاسىپ شىعىپ ايتىس وزدىردى. وسىلايشا كورەرمەننىڭ كوڭىلىن كوتەرىپ، زالدى كۇلكىمەن سىلكىندىرىپ ءساتتى وتكەن دۋماندى قىزىق ايتىس ءوز مارەسىنە دە جەتتى.
بۇل ايتىستا ۇيىمداستىرۋشىلار جۇلدەنى جەكە اقىنعا ەمەس، وزىپ شىققان ءبىر جۇپقا بەرۋدى ۇيعارىپتى. الايدا، باس جۇلدەگە تىگىلگەن 1 ميلليون تەڭگەنى قازىلاردىڭ شەشىمىمەن تەڭدەي ونەر كورسەتكەن ەكى جۇپقا ءبولىپ بەرۋگە تۋرا كەلدى. ولار، تارتىمدى، ورەلى جىرمەن، كەلىستى ايتىس وزدىرعان بالعىنبەك يماشيەۆ پەن جانار ايجانوۆا جانە سەرىكزات دۇيسەنعازين مەن روزا ءالقوجانىڭ جۇپتارى بولدى.
باقىتجول كاكەش