سپورت: قانات يسلام «قازاقپاراتقا» سۇحبات بەرۋگە كەلدى

استانا. قازاقپارات - بەيجىڭ وليمپياداسىنىڭ قولا جۇلدەگەرى، تانىمال كاسىپقوي بوكسشى قانات يسلام «قازاقپارات» حالىقارالىق اقپاراتتىق اگەنتتىگىنە ەكسليۋزيۆتى سۇحبات بەرۋگە قوناققا كەلدى.

سۇحباتتىڭ تولىق ءماتىنىن الداعى ۋاقىتتا جاريالايتىن بولامىز.

قانات يسلام ۇلى - ق ح ر، شىنجاڭ ۇيعىر اۆتونوميالى ولكەسىندە 13 - قىركۇيەك 1984 - جىلى دۇنيەگە كەلگەن. ول - كاسىپقوي بوكسشى، WBA FedeCaribe تۇجىرىمىنىڭ چەمپيونى. قانات يسلام ورتاشا جەڭىل سالماق بويىنشا كاريب ايماعىنىڭ ۇزدىگى.

اۋەسقوي بوكسشى رەتىندە قىتاي حالىق رەسپۋبليكاسى ۇلتتىق قۇراما كومانداسىنىڭ قۇرامىندا بەيجىڭ وليمپياداسىنىڭ قولا جۇلدەگەرى، چيكاگودا وتكەن الەم چەمپيوناتىنىڭ (2007) جانە ازيا ويىندارىنىڭ (2006) قولا جۇلدەگەرى.

قىتايدىڭ 10 دۇركىن چەمپيونى. ۇلتى - قازاق. 2010 - جىلى ازاماتتىعىن اۋىستىرىپ، اتامەكەنى قازاقستانعا كوشىپ كەلدى. ول «استانا ارلاندارى» كاسىبي كلۋبىنىڭ مۇشەسى رەتىندە 2012 - جىلعا دەيىن ونەر كورسەتتى. قازىر كاسىپقوي بوكسشى، نەلسون (ا ق ش) پروموۋتەرلىك كلۋبى اتىنان 18 جەكپە جەك وتكىزىپ، ونىڭ 15 ىندە نوكاۋتپەن جەڭىسكە جەتتى. لاقاپ اتى - قازاق.

ءبىلىمى - جوعارى، ءۇرىمجى قالاسىنداعى پەداگوگيكالىق ۋنيۆەرسيتەتىن 2009 - جىلى ءتامامداعان.

قاناتتىڭ لوندون وليمپياداسىنا قاتىسۋىنا قىتاي تاراپى قارسىلىق كورسەتتى. AIBA بۇل ماسەلەنى قاراستىرىپ، قاناتقا قازاقستان اتىنان سايىسقا تۇسۋگە رۇقسات بەردى. الايدا، قانات ۇلتتىق قۇراما كوماندا باپكەرلەرى تاراپىنان قولداۋ تاپپاي، لوندون وليمپياداسىنا قاتىسا المادى.