ستيلشى مەكتەپ فورماسىن قازاقي ناقىشتا تىگۋدى ۇسىنادى

استانا. قازاقپارات - قازاقتىڭ ويۋ-ورنەكتەرىمەن كومكەرىلگەن ۇلتتىق كيىمگە تاپسىرىس بەرەتىن وتانداستارىمىزدىڭ سانى وتە از.

بۇگىندە اتاۋلى مەرەكەلىك شارالاردا عانا يىقتارىنا شاپان جاباتىن قازاق حالقى كۇندەلىكتى تۇرمىستا ۇلتتىق كيىم كيسە، نۇر ۇستىنە نۇر بولار ەدى، دەدى Almaty.tv تىلشىسىنە جەكە ستيل بويىنشا كەڭەسشى مادي بەكداير مالىمدەدى.

«قازاقتىڭ ۇلتتىق كيىمدەرىنە تاپسىرىس جوقتىڭ قاسى. بىزگە ساتىپ الۋشىلار اتاۋلى داتالار مەن مەرەيتويلار قارساڭىندا كيىم تىكتىرۋ ءۇشىن كەلەدى. نەگىزىنەن زاماناۋي كويلەكتەردى كۇمىستەن جاسالعان قازاقتىڭ ۇلتتىق اشەكەيلەرىمەن كومكەرەمىز. ۇلتتىق كيىمدەرگە تاپسىرىس كوبىندە كومپانيالاردان تۇسەدى. ولار فوتوسەسسيا وتكىزگەندە ۇلتتىق ناقىشتاعى كيىمدەردى قولدانادى. ال قازاقتىڭ ويۋ-ورنەكتەرىمەن جاسالعان قامزول، شاپانداردى جەكە كەلىپ، تىكتىرتىندەردىڭ سانى سيرەك. ۇلتتىق كيىمگە كەلۋشىلەر دايىن كيىم-كەشەكتەردى ساتىپ الۋدا»، - دەدى بەكداير.

مودەلەردىڭ ايتۋىنشا، كۇندەلىكتى تۇرمىستا ۇلتتىق ناقىشتاعى كيىمدەردى ەنگىزۋ ءۇردىسىن وقۋشىلاردان باستاعان ابزال.

«مەنىڭ ويىمشا، قازاقتىڭ ۇلتتىق كيىمدەرىن كيۋ ءۇردىسىن كۇندەلىكتى تۇرمىسقا ەنگىزۋ قاجەت. بۇل وتە ادەمى كورىنىس بولادى. مىسالى، ءۇندىستان نەمەسە افريكاعا بارساق، سول ەلدىڭ ۇلتتىق كيىمىن كيىپ جۇرگەن ازامات پەن ازاماتشالاردى ءجيى كەزدەستىرەمىز. ال ءبىزدىڭ ەلىمىزدە بانك قىزمەتكەرلەرى مەن ستيۋاردەسسالاردان باستاساق، جالعاسىن تابادى دەگەن ويدامىن. مەكتەپ وقۋشىلارىنىڭ كيىمدەرى دە ۇلتتىق ناقىشتا جاسالسا، كەرەمەت بولار ەدى»، - دەدى مادي بەكداير.

ۇلتتىق كيىمدەردى ساتىپ الۋعا كەز كەلگەن ازاماتتاردىڭ قاراجاتى جەتە بەرمەيدى. سەبەبى، قازاقي ناقىشتا جاسالعان قامزولداردىڭ باعاسى دۇكەندەردە اسقاقتاپ تۇر. ال بازاردا تۇرعان كيىمدەردىڭ ساپاسى سىن كوتەرمەسى انىق. مودەل رەتىندە پوديۋمعا ديزاينەردىڭ قولىنان شىققان ۇلتتىق ۇلگىدەگى كوللەكتسيالاردى حالىق نازارىنا ۇسىنىپ جۇرگەن ايجان بايزاقوۆانىڭ باعا تۋراسىندا وزىندىك پىكىرى بار.

«ۇلتتىق كيىمدەردى باعاسىنا قاراي ەكى توپقا ءبولىپ قاراستىرار ەدىم. فابريكادان شىعاتىن ستراندارتتى كيىمدەر مەن ديزاينەردىڭ قولىنان شىققان كوللەكتسيالار. بازاردا، كيىم دۇكەندەرىندە ساتىلاتىن دايىن ستاندارتتى قامزولدار، شاپانداردى ايتاتىن بولساق، ولاردىڭ باعالارى قونىمدى، قول جەتىمدى دەپ ايتا الار ەدىم. ال ديزاينەردىڭ قولىنان شىققان كيىمدەر قاراپايىم حالىق ءۇشىن وتە قىمبات.

مىسالى، ديزاينەردىڭ كىشكەنتاي سابيگە، تۇساۋكەسەرگە ارنالعان كيىمىنىڭ ءوزى ۇلكەن ادامنىڭ كۇردەلى، سىرتقى كيىمىنىڭ باعاسىمەن بىردەي نەمەسە ءتىپتى اسىپ كەتەدى. وسىنداي قىمبات كيىمدى كىشكەنتاي ءسابي از ۋاقىت قانا كيەدى. ديزاينەردىڭ جاساعان ۇلتتىق ۇلگىدەگى كوللەكتسيالارى وتە جاقسى، كوڭىلدەن شىعادى، ساپاسى دا جاقسى. قولدان جاسالعان بولعاندىقتان با باعاسى تىم قىمبات. كوپ جاعدايلاردا ول كيىمدەردى ساحنا مەن ەكران الدىندا جۇرگەن ادامدار تاپسىرىس بەرىپ، ساتىپ الادى»، - دەدى ايجان بايزاقوۆا.

الەم ارەناسىنا شىقسا، تورتكۇل دۇنيەنى مويىنداتاتىن قازاقتىڭ ۇلتتىق كيىمدەرى تويدا عانا ەمەس، كۇندەلىكتى تىرشىلىكتە كورىنىس تاپسا كوز ۇيرەنەتىنى انىق. وتاندىق تىگىنشىلەر قازاقي ويۋ-ورنەكتەرمەن ساندەلگەن كيىمەردى مەرەكەرگە عانا ارناپ تىكپەي، تۇرمىستا كيگەنگە قولايلى ەتىپ تىكسە قوعامنىڭ قازاقي كيىمدەرگە دەگەن قىزىعۋشىلىعى ارتارى ءسوزسىز.

مەرۋەرت ساعىمحان