الماتىعا جيھانگەر كەلدى
سالحەيم مىرزانىڭ پىكىرىنشە، جاستايىنان تاۋ- تاستى كەزىپ، ادامنىڭ كۇش- جىگەرى مەن مۇمكىندىكتەرىن جان- جاقتى سىناۋمەن اينالىسىپ كەلە جاتقان ول بۇل جولى قازاقستانمەن، ونىڭ ىشىندە، ارۋ الماتىمەن تانىسىپ، قالا ماڭىنداعى كورىكتى تابيعاتتىڭ كەرەمەتتەرىن كوزىمەن كورىپ، قازاق ەلى تۇرعىندارىنىڭ تىنىس- تىرشىلىگىمەن تانىسۋدى ءجون ساناپتى.
- مەن الەمنىڭ تالاي تۇكپىرىن ارالاپ، اتاپ ايتقاندا، ءبىرقاتار ەلدەردەگى الىپ شىڭداردى باعىندىرۋعا، ءتىپتى تابيعاتتىڭ الۋان ءتۇرلى قيىندىقتارىمەن بەتپە- بەت كەلگەن ادامنىڭ ءبىرىمىن. سوندىقتان قازاقستانمەن، ونىڭ قايتالانباس تاماشا تابيعاتىمەن تانىسۋ مەن ءۇشىن جىلدار بويعى ارمانىم ەدى. سوڭعى ءبىر- ەكى جىلدا الماتى وزىنە قاتتى تارتتى. مەنى وزىنە باۋراعان - قالانىڭ جازدا قۇلپىرىپ، قىستا قالىڭ قار باساتىن ەرەكشە تابيعاتى. باستى ماقساتىم - تابيعاتى كۇردەلى دە قيىن الەم ەلدەرىن ارالاپ، ادام بالاسىنىڭ بويىنداعى تىلسىم كۇشتى، ونىڭ مۇمكىندىكتەرىن انىقتاپ، وعان كوز جەتكىزۋ. بيىل مىنە، قىس ايىندا الماتىعا ارنايى كەلدىم. قالا تابيعاتى، مەدەۋ مۇز ايدىنى مەن شىمبۇلاق تاۋ شاڭعىسى كەشەنى ورنالاسقان ايماقتىڭ تابيعاتى قانداي تاماشا! جاڭادان سالىنىپ، پايدالانۋعا بەرىلگەن قالا ىرگەسىندەگى ترامپللين قانداي كەرەمەت!
وسىنداي تاماشا ءارى الەمدىك تالاپقا ساي سپورت كەشەندەرىنىڭ سالىنۋى قازاق ەلىنىڭ بولاشاعى زور ەكەندىگىن پاش ەتەدى. بۇگىن مەن ب ا ق وكىلدەرىمەن شىمبۇلاق شاتقالىنىڭ اپپاق قار باسقان قويناۋىندا كەزدەسۋدى ءجون سانادىم. ماعان وسىنداي ۇمىتىلماس كەزدەسۋ ۇيىمداستىرعانى ءۇشىن «كوكجايلاۋ» تاۋ شاڭعىسى كەشەنىنىڭ باسشىلىعىنا ريزاشىلىعىمدى بىلدىرەمىن. مەن ءوز تاجىريبەمدە مۇمكىندىگى شەكتەۋلى ازاماتتاردىڭ قانداي ءىس- شارالارعا بەيىم ەكەندىگىن بايقاعىم كەلىپ، ولاردى وزىممەن بىرگە سان مارتە الەم ەلدەرىن ارالاۋ ەكسپەديتسياسىنا تارتتىم. سوندا بايقاعانىم، كوپشىلىك قاۋىم سونشالىقتى ءمان بەرمەيتىن، ەلەگىسى دە كەلمەيتىن مۇمكىندىگى شەكتەۋلى جانداردىڭ دا تالاي شىڭداردى باعىندىرا الاتىندىعىنا كوز جەتكىزدىم. ومىردە تەپەرىش كورىپ جۇرگەن وسىنداي ازاماتتاردىڭ مۇمكىندىگىن پايدالانۋعا ارنالعان مەنىڭ ءبىراز جوبام بار. ەگەر قالا اكىمدىگى قۇپ كورىپ جاتسا، سول جوبالاردى الماتىدا جۇزەگە اسىرسام دەگەن ويدامىن.
الماتىنىڭ ىرگەسىنەن «كوكجايلاۋ» تاۋ شاڭعىسى كەشەنى سالىنباقشى ەكەن. مەن وسىدان بىرەر كۇن بۇرىن الماتى ترامپللينىندە بولدىم. سوندا بايقاعانىم، سىزدەردە كوپشىلىگىندە ارنايى سالىنعان اسەم دە بيىك، حالىقارالىق ستاندارتتارعا ساي ءزاۋلىم سپورت كەشەندەرى تەك سپورت جارىستارى وتكىزىلگەندە عانا پايدالانىلادى. ال باسقا ۋاقىتتاردا بوس تۇرادى ەكەن. بۇل ارينە، دۇرىس ەمەس. ءبىزدىڭ نورۆەگيادا سپورت عيماراتتارى وتە كوپ. الايدا، ولاردىڭ بارلىعى قىسى- جازى ادامنان بوسامايدى. مۇندا سپورتتىق جارىستار بولماعان كەزدە قاراپايىم تۇرعىندار ءۇشىن الۋان ءتۇرلى ساۋىقتىرۋ شارالارى وتكىزىلەدى. سوندىقتان وسىنداي ءىس- شارالاردى الماتىنىڭ سپورت كەشەندەرىندە دە ۇيىمداستىرىپ، قىرۋار قارجىعا سالىنعان سپورت كەشەندەرىن ءتيىمدى پايدالانسا، جۇمسالعان قارجىنى از عانا ۋاقىتتا قازىناعا قايتارۋعا بولادى. «كوكجايلاۋ» شاڭعى كەشەنىن سالۋ ماسەلەسىنە بايلانىستى. كوكجايلاۋ شاڭعى سپورتىن دامىتۋعا سۇرانىپ تۇر. قورىتا ايتسام، الماتىنىڭ ىرگەسىندەگى الاتاۋدىڭ باۋرايى قىستا دا، جازدا دا الۋان ءتۇرلى سپورتتىق جانە باسقا دا ويىن- ساۋىق شارالارىن وتكىزۋگە قولايلى ەكەن. تابيعاتى كەرەمەت وسىنداي ايماقتا ءومىر ءسۇرىپ وتىرعان سىزدەر قانداي باقىتتىسىزدار، - دەپ نورۆەگيالىق جيھانگەز ينگە سالحەيم ءوز ويىن ءبىلدىردى.
ودان كەيىن ءسوز العان «كوكجايلاۋ» تاۋ شاڭعىسى كەشەنىنىڭ اتقارۋشى ديرەكتورى ليۋكا مارشان الداعى ۋاقىتتا تابيعاتى تاماشا وسى ءبىر ايماقتا تاۋ شاڭعىسىن وتباسىلىق ۇلگىدە دامىتۋعا ارنالعان حالىقارالىق سۇرانىسقا ساي كەلەتىن ارنايى سپورت كەشەنى بوي كوتەرەتىنىن جەتكىزدى.
جومارت مولداحمەت ۇلى
«ايقىن»