ۇلتتىق ۇلاننىڭ كىشى سەرجانتى ەرلىگى ءۇشىن «ايبىن» وردەنىمەن ماراپاتتالادى
2014-جىلى 15- جەلتوقساندا ساعات 15.00 دە يلينكا كەنتىندە قازاقستان رەسپۋبليكاسى ۇلتتىق ۇلانىنىڭ جاڭا اسكەري قالاشىعىندا تاۋەلسىزدىك كۇنىن مەرەكەلەۋگە ارنالعان سالتاناتتى ءىس-شارا وتەدى. وندا ۇلتتىق ۇلاننىڭ 6505 اسكەري ءبولىمى 8- اتقىشتار روتاسىنىڭ جاۋىنگەرى كىشى سەرجانت اقىلبەك قوڭىروۆقا مەملەكەتتىك ناگرادا -Ⅲ دارەجەلى «ايبىن» وردەنى تابىستالادى. وردەندى سالتاناتتى تۇردە ەلباسىنىڭ اتىنان جاۋىنگەرگە ۇلتتىق ۇلان باس قولباسشىسى گەنەرال- لەيتەنانت رۋسلان جاقسىلىقوۆ تاپسىرادى.
«ق ر پرەزيدەنتىنىڭ جارلىعىمەن اقىلبەك جوعارى ماراپاتقا تاۋەلسىزدىك كۇنى قارساڭىندا لايىق دەپ تانىلدى. مەملەكەتتىك ناگراداعا ۇسىنۋعا جاۋىنگەردىڭ بىلتىر مامىر ايىنداعى ەرجۇرەكتىلىگى مەن قايسارلىعى سەبەپ بولدى. كىشى سەرجانت اقىلبەك قوڭىروۆ بۇل كۇنى ءوز پاتەرىندە كەزەكتى قىزمەتكە تۇسۋگە دايىندالىپ جاتقان. كەنەتتەن ول ەسىگىن بىرەۋدىڭ قاعىپ تۇرعانىن ەستيدى. اقىلبەك ەسىك اشقاندا قاتتى قوبالجىعان كورشىسى اندرەيدى كورەدى. ول بىرگە تۇراتىن ايەلى وكسانانى بۇرىنعى كۇيەۋى، بۇعان دەيىن ءتورت رەت سوتتالعان ۆلاديمير پىشاقتاپ تاستاعانىن ايتىپ، كومەك سۇرايدى. اقىلبەك سول ساتتە ەش ويلانباستان قويان-قولتىق ۇرىستىڭ ايلا-تاسىلىمەن قىلمىسكەردى قۇرىقتاپ، قولىن بايلايدى. پوليتسيا قىزمەتكەرلەرى كەلگەندە اقىلبەك قىلمىسكەردى قولدارىنا تاپسىرادى. قىلمىسكەردىڭ قولىنان وكسانا اۋرۋحاناعا جەتپەستەن جان تاپسىردى»، - دەلىنگەن حابارلامادا.
سونىمەن قاتار، سالتاناتتى جيىنعا استانا گارنيزونى بويىنشا 5573, 6636 جانە 3660 اسكەري بولىمدەرىنىڭ جەكە قۇرامدارى، سونداي-اق ۇلتتىق ۇلان باس قولباسشىلىعىنىڭ وفيتسەرلەرى مەن كەلىسىم-شارت بويىنشا اسكەري قىزمەتشىلەرى قاتىسادى. ءىس-شاراعا اسكەر ارداگەرلەرى، ءوزارا ءىس-ارەكەت ورگاندارى مەن ب ا ق وكىلدەرى شاقىرىلعان. سالتاناتتى جاعدايدا ۇزدىك قىزمەتىمەن كوزگە تۇسكەن ءبىر توپ اسكەريلەرگە قازاقستان رەسپۋبليكاسىنىڭ ىشكى ىستەر ءمينيسترى مەن ۇلتتىق ۇلان باس قولباسشىسىنىڭ اتىنان ماراپاتتار تارتۋ ەتىلەدى. ءىس-شارا ۇلتتىق ۇلان ءان-بي ءانسامبلىنىڭ مەرەكەلىك كونسەرتىمەن اياقتالادى.
Ⅲ دارەجەلى «ايبىن» وردەنى 1995-جىلى تاعايىندالعان بولاتىن. وردەن جوعارى جاۋىنگەرلىك دايىندىعىن جۇرگىزۋ، قۇقىق قورعاۋ جانە قوعامدىق ءتارتىپتى مەڭگەرگەن، جاۋىنگەرلىك دايىندىق سالاسىنداعى جەتىستىكتەرى ءۇشىن، قارۋلى كۇشتەردىڭ باسقا دا اسكەرلەرى مەن اسكەري قۇرالىمداردىڭ مۇشەلەرىنە، سونداي-اق پروكۋراتۋرا، ۇلتتىق قاۋىپسىزدىك، ىشكى ىستەر قىزمەتكەرلەرىنە اسكەري جانە قىزمەتتىك مىندەتتەرىن ورىنداۋ كەزىندە كورسەتكەن باتىلدىعى مەن جانقيارلىعى ءۇشىن، مەملەكەت مۇددەلەرىن قورعاۋداعى ەرلىگى ءۇشىن تابىس ەتىلەدى. «ايبىن» وردەنىنىڭ ءۇش دارەجەسى بار. I جانە Ⅱدارەجەلى «ايبىن» وردەنىمەن كىشى جانە اعا وفيتسەرلەر، ال Ⅲ دارەجەلى «ايبىنمەن» سولداتتار، ماتروستار، سەرجانتتار، وفيتسەرلەر مەن ميچماندار ماراپاتتالادى.