قاشاعان كەن ورنىنان مۇناي ايدايتىن قۇبىرلار شەتەلدىك كومپانيالار بيۋجەتى ەسەبىنەن اۋىستىرىلماق
«قاشاعان كەن ورنىنان قۇرلىققا مۇناي مەن كۇكىرتتى گاز ايدالاتىن قۇبىرلاردى سالۋ جوبانىڭ شەتەلدىك قاتىسۋشىلارىنىڭ بيۋجەتى ەسەبىنەن جۇزەگە اسىرىلماق. قۇنى بىرنەشە ميلليارد دوللار بولاتىن بۇل جۇمىستار جوبانىڭ جالپى قۇنىنا كىرمەيدى»، - دەدى س. دە مايە.
ەستەرىڭىزگە سالا كەتەيىك، ءونىمدى ءبولىستىرۋ كەلىسىمىنە سايكەس، قاشاعاندى يگەرۋ جوباسىن جۇزەگە اسىرۋ شىعىندارىن قازاقستان مۇناي الىنا باستاعان سوڭ وتەۋى ءتيىس. 2013-جىلى كۇزدە قاشاعان كەن ورنىندا باستالعان مۇناي الۋ ءىسى قۇبىرلارداعى اقاۋلارعا بايلانىستى ۋاقىتشا توقتاتىلعان ەدى. ونىڭ سەبەبى رەتىندە «قۇبىرلارعا ارتىق جۇكتەمە ءتۇسۋى سالدارىنان ولاردىڭ سۋلفيدتى جارىقشاقتانۋى» اتالعان بولاتىن. 2015-جىلى وسى قۇبىرلاردى اۋىستىرۋ ءىسى قولعا الىنباق. ءار قۇبىردىڭ جالپى ۇزىندىعى - 96 شاقىرىم. جوبانى جۇزەگە اسىرۋعا ازىرلىك باستالدى. بۇل جۇمىستار 2016-جىلدىڭ ەكىنشى جارتىسىندا اياقتالادى دەپ جوسپارلانۋدا.