قازاقستان ءۇندىستان پرەمەر- ءمينيسترى نارەندرا موديدىڭ ساپارىنا زور ءمان بەرەدى - مەملەكەت باسشىسى
«قازاقستان ۇندىستانمەن اراداعى بايلانىستى نىعايتۋعا، ىنتىماقتاستىقتى دامىتۋعا مۇددەلى. ءبىز ەكىجاقتى ىنتىماقتاستىقتى ستراتەگيالىق سەرىكتەستىك دەڭگەيىنە شىعارۋ ءۇشىن زور سەرپىلىس جاسادىق. كەلەر جىلى جوسپارلانعان ءۇندىستان پرەمەر- ءمينيسترى نارەندرا موديدىڭ ساپارىنا ءبىز وتە زور ءمان بەرەمىز»، - دەدى ەلباسى.
«قۇرمەتتى ەلشى مىرزالار! سىزدەر الەمدىك قۇرىلىم تەرەڭ وزگەرىسكە ۇشىراپ جاتقان كەزدە قىزمەتكە كىرىسىپ وتىرسىزدار. بۇگىندە جاھاندىق جاڭا ءتارتىپ، جاڭا ارحيتەكتۋرا قالىپتاسۋ ۇستىندە. جەرگىلىكتى جانە وڭىرلىك قاقتىعىستار، حالىقارالىق تەرروريزم مەن ەكسترەميزم ەتەك الۋدا. ونىڭ الدىن الۋ ءۇشىن كۇرەس بۇكىل مەملەكەتتەردىڭ كۇشىن بىرىكتىرۋى قاجەت. ءبىز ستراتەگيالىق تۇراقتىلىق پەن ورنىقتى دامۋ جولىندا بىرلەسە ىزدەنۋگە نيەتتىمىز» ، - دەدى ەلباسى.
سونىمەن قاتار ق ر پرەزيدەنتى ءوز سوزىندە قازاقستاننىڭ يادرولىق قارۋدى تاراتپاۋ رەجىمىن نىعايتۋ جولىنداعى جاھاندىق قوزعالىستىڭ باسىندا كەلە جاتقانىن باسا ايتتى. «ءبىز حالىقارالىق ىستەرگە بۇرىنعىدان دا بەلسەندى قاتىسۋدى كوزدەپ وتىرمىز»، - دەدى مەملەكەت باسشىسى.
ن. نازاربايەۆ ءوز سوزىندە ەلشىلەر قاپەرىنە كەڭەيتىلگەن سەرىكتەستىك پەن ىنتىماقتاستىق تۋرالى كەلىسىم جوباسى بويىنشا قازاقستان ەۋروپالىق وداقپەن كەلىسسوز اياقتاعاندىعىن، دۇنيەجۇزىلىك ساۋدا ۇيىمىنا كىرۋدىڭ سوڭعى ساتىسىندا تۇرعانىن سالىپ ءوتتى.
«ەكونوميكالىق ىنتىماقتاستىق جانە دامۋ ۇيىمى ستاندارتتارىن دا بەلسەندى ەنگىزىپ جاتىرمىز. ءبىز ەۋرازيالىق ەكونوميكالىق وداقتىڭ بىرىككەن نارىعىنىڭ ءبىر بولىگى بولىپ سانالامىز. سول سەبەپتى بۇل وداققا مۇشە ەلدەرمەن وزگە ساۋدا سەرىكتەستەر اراسىندا دانەكەر بولۋعا ءازىرمىز»، - دەدى ۇلت كوشباسشىسى.
ايتا كەتەيىك، بۇگىن ق ر پرەزيدەنتىنە يتاليانىڭ توتەنشە جانە وكىلەتتى ەلشىسى ستەفانو راۆانيان، شۆەتسيا ەلشىسى كريستيان كاميلل، چەح ەلشىسى ەليشكا جيگوۆا، ليتۆا ەلشىسى ۆيتاۋتاس ناۋدۋجاس، مىسىر ەلشىسى حايسام سالاح كامەل يبراگيم، ءۇندىستان ەلشىسى حارش كۋمار دجاين، ماكەدونيا ەلشىسى يليا پسالتيروۆ، قىتاي ەلشىسى چجان حانحۋەي سەنىم گراموتاسىن تابىس ەتكەن بولاتىن.
اۆتور: مارلان جيەمباي