شوپتەن جاسالعان قۇران كىتابى تابىلدى

استانا. قازاقپارات - جاسالعان ۋاقىتىنان اراعا وتىز جىل وتكىزىپ، دۋباي قالاسىندا قۇران كارىمنىڭ الەمدەگى تۇڭعىش شوپتەن جاسالعان نۇسقاسى تابىلدى.

«ءبىز ءۇشىن وسى قاسيەتتى قۇران كىتابىنىڭ تاماشا نۇسقاسىن جاساۋعا ءومىرىن ارناعان حاكيم حامدي تاحەردىڭ ەڭبەگىنە يە بولۋ ۇلكەن باقىت» دەيدى كوركەمونەر سالاسى بويىنشا يسلام كەڭەسشىسى ازيز بين حاسسان مۋلاۆي مالاباري. بۇل تۋرالى muslim.kz حابارلادى.

تۇرىك دارىگەرى حامدي تاحەردىڭ 22 جىلعى كوز مايىن تاۋىسىپ جاساعان قۇران كىتابى يۋناني مەديتسينا جۇيەسىنە سايكەس «جوعارى كونسەنتراتتى» ءشوپ قوسپالارىنان تۇرادى. شامامەن 200 كومپونەنتتەن تۇراتىن بۇل تاماشا تۋىندىنىڭ ەمدىك تەراپيەۆتىك تە قاسيەتتەرى بار. ونى وقىعان وقىرماننىڭ قۇران كىتابىن پاراقتاپ اشقاندا ادام دەنساۋلىعىنا تيگىزەر پايداسى دا انىقتالدى.

مۇنىڭ ءمانى، ساۋساق ارقىلى ءشوپ قوسپالارى ءوز پايداسىن تيگىزەتىندىگىندە بولىپ وتىر. 7,5 كەلى سالماق تارتاتىن قاسيەتتى كىتاپتىڭ قۇرامىندا مىناداي ەلەمەنتتەر بار: يۋناني مەديتسيناسىندا قولدانىلاتىن جەمىس، وسىمدىك تۇقىمى، جاپىراق، ساباق جانە تامىر، قابىقتارى. يۋناني اراب تىلىندە «يونييلىك»، ياعني «گرەكتىك» دەگەن ماعىنا بەرەدى. بۇل مەديتسينا تاريح بەتىندە 6 عاسىردان استام ءومىر ءسۇرىپ كەلەدى.