تۇركىتىلدەس مەملەكەتتەر اياسىنداعى «تۇركى تاريحى» وقۋلىق باعدارلاماسى ماقۇلداندى

استانا. قازاقپارات - حالىقارالىق تۇركى اكادەمياسى ازىرلەگەن تۇركى كەڭەسى مەملەكەتتەرىنىڭ (قازاقستان، تۇركيا، ازەربايجان، قىرعىزستان) ورتا مەكتەپتەرىنە ارنالعان تاريح بويىنشا وقۋلىق باعدارلاماسى ماقۇلداندى.

بۇل تۋرالى استاناداعى حالىقارالىق تۇركى اكادەمياسىنىڭ باسپا ءسوز قىزمەتىنەن حابارلاندى.

«تۇركىتىلدەس ەلدەر باسشىلارى 2012 - جىلى بىشكەكتە وتكەن تۇركى كەڭەسىنىڭ II سامميتىندە «تۇركى تاريحى» ءپانىن وقىتۋعا قاتىستى ورتاق شەشىمگە كەلگەن بولاتىن.

بۇل ۇيعارىم 2013 - جىلى گابالادا جانە بيىل بودرۋمدا وتكەن تۇركى كەڭەسى سامميتتەرىندە تاعى دا قالداۋعا يە بولدى.

ناتيجەسىندە ورتا مەكتەپتەرگە ارنالعان تاريح وقۋلىعى باعدارلاماسى جۋىردا باكۋ قالاسىندا وتكەن تۇركىتىلدەس مەملەكەتتەردىڭ ىنتىماقتاستىق كەڭەسىنە (تۇركى كەڭەسى) قاتىسۋشى- مەملەكەتتەر ءبىلىم مينيسترلەرىنىڭ ءۇشىنشى وتىرىسىندا ماقۇلداندى»، دەلىنگەن باسپا ءسوز بايانىندا.

ەستەرىڭىزگە سالا كەتەيىك، جيىنعا ازەربايجان رەسپۋبليكاسىنىڭ ءبىلىم ءمينيسترى ميكايل جابباروۆ، قىرعىزستان رەسپۋبليكاسىنىڭ ءبىلىم جانە عىلىم ءمينيسترى كانات سادىقوۆ، تۇركيا رەسپۋبليكاسىنىڭ ۇلتتىق ءبىلىم ءمينيسترى ءنابي اۆجى، قازاقستان رەسپۋبليكاسى ءبىلىم جانە عىلىم مينيسترلىگىنىڭ جاۋاپتى حاتشىسى ءاليا عالىموۆا باستاعان اتالعان ەلدەردىڭ سالا ماماندارى جانە تۇركى كەڭەسىنىڭ باس حاتشىسى راميل حاسانوۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى قاتىسقان بولاتىن.

القالى جيىندا تاراپتار تۇركى حالىقتارىنىڭ گەوگرافياسى مەن ادەبيەتى بويىنشا دا وقۋلىقتار دايارلاۋ تۋرالى كەلىسىمگە كەلدى.

اۆتور: قانات مامەتقازى ۇلى