ەلباسى قاز ۇ ۋ-دا ج و و-لار تاريحىنداعى تۇڭعىش دياگنوستيكالىق ورتالىقتىڭ تۇساۋىن كەستى

الماتى. قازاقپارات - الماتىداعى ساپارى بارىسىندا ق ر پرەزيدەنتى نۇرسۇلتان نازاربايەۆ ءال-فارابي اتىنداعى قازاق ۇلتتىق ۋنيۆەرسيتەتىندە قازاقستانداعى جوعارى وقۋ ورىندارى تاريحىندا تۇڭعىش رەت جۇزەگە اسقان مەديتسينالىق دياگنوستيكالىق ورتالىقتى اشىپ، ۇجىم جۇمىسىنا ساتتىلىك تىلەدى.

اشىلۋ سالتاناتىنا اتالعان ۋنيۆەرسيتەت رەكتورى عالىمقايىر مۇتانوۆ، كورەيانىڭ دەنساۋلىق ساقتاۋ جانە الەۋمەتتىك قامسىزداندىرۋ ۆيتسە-ءمينيسترى كۆون دوك چول، قازاقستانداعى كورەيا رەسپۋبليكاسىنىڭ ەلشىسى بەك چجۋ حيەن، «KHIDI» دەنساۋلىقساقتاۋ يندۋسترياسىن دامىتۋ بيۋروسىنىڭ باس ديرەكتورى كيم چو يل، «يەنسە» ۋنيۆەرسيتەتى جانىنداعى «كانگنام سيەۆەرانس» ەمحاناسىنىڭ باس ديرەكتورى كيم حەن دجۋن، اتالعان ۋنيۆەرسيتەتتىڭ مەديتسينالىق ينستيتۋتىنىڭ دەكانى لي بيەن سوك قاتىستى.

مەملەكەتتىك جانە جەكە مەنشىك سەرىكتەستىك ارقاسىندا ۋنيۆەرسيتەت جانىنداعى وسىنداي ايرىقشا ورتالىقتى قۇرۋعا قول جەتتى.

2011 - جىلدىڭ تامىزىندا وڭتۇستىك كورەيا پرەزيدەنتى لي مەن باكتىڭ قازاقستانعا ساپارىنان سوڭ ەكى ەلدىڭ دەنساۋلىق ساقتاۋ مينيسترلىكتەرىنىڭ اراسىندا ءوزارا ىنتىماقتاستىق تۋرالى كەلىسىمگە قول قويىلعان بولاتىن.

جوبانىڭ ماقساتى: ق ر دەنساۋلىق ساقتاۋ جانە ءبىلىم بەرۋ جۇيەسىنىڭ باسەكەگە قابىلەتتىلىگىن ارتتىرۋ، مەديتسينا سالاسىنداعى ەلدىڭ عىلىمي-كادرلىق الەۋەتىن دامىتۋ، حالىقارالىق ىنتىماقتاستىقتى، يننوۆاتسيالىق مەديتسينالىق تەحنولوگيالار ترانسفەرتىن كەڭەيتۋ، مەديتسينالىق قىزمەتتەر وندىرىسىمەن عىلىمي-زەرتتەۋ جانە ءبىلىم بەرۋ قىزمەتىن ينتەگراتسيالاۋ. جوبانى جۇزەگە اسىرۋعا العاشقى قادام وڭتۇستىككورەيلىك ارىپتەستەرمەن مەديتسينالىق دياگنوستيكالىق ورتالىق اشۋ بولدى.

ول اتالعان وقۋ ورنى اۋماعىندا 2400 شارشى مەتر جەردى الىپ جاتىر. جوباعا 1,2 ميلليارد تەڭگە كولەمىندە ينۆەستيتسيا سالىندى.

«وسى جوبانىڭ جۇزەگە اسۋىنا ءوز ۇلەسىن قوسقان ءار ازاماتقا العىسىمدى بىلدىرەمىن. سىزدەر ءبىلىم- عىلىم، دەنساۋلىق ساقتاۋ سالاسىندا ءوزارا ىنتىماقتاستىقتى نىعايتۋعا سەرپىن بەردىڭىزدەر. قازاقستانداعى ستۋدەنتتەرگە ارنالعان تۇڭعىش مەديتسينالىق ورتالىق ەلدەگى دەنساۋلىق ساقتاۋ سالاسىنىڭ دەڭگەيى جوعارىلاعانىن كورسەتەدى»، - دەدى قاز ۇ ۋ-دىڭ رەكتورى.

ج و و باسشىسى سونداي-اق جوبانى ىسكە اسىرۋعا ەلشىلىك، دەنساۋلىق ساقتاۋ مينيسترلىگى، دەنساۋلىق ساقتاۋ يندۋسترياسىنىڭ بيۋروسى، دەنساۋلىق ساقتاۋ يندۋسترياسىن دامىتۋ ينستيتۋتى، دەنساۋلىق ساقتاۋ ساياساتى مينيسترلىگى، «پوسكو» كومپانياسى جانە كورەيا رەسپۋبليكاسىنان باسقا دا ارىپتەستەر تارتىلعانىن اتاپ ءوتتى.