باي قىزىن جەڭگەن اقىن جىگىتتىڭ تاپقىرلىعى
سول قىزدىڭ ولەڭىنە ىلىك تاۋىپ ايتا الماي، تالاي قوناق قونا الماي كەتىپتى. سونداعى قىزدىڭ ولەڭى:
«ونەر تاپسا جىگىتتىڭ باعى بولدى،
كەشە كەلىپ قوناقتار تاعى بولدى.
اي توپىردى كۇن سايىن سالماس بولار،
قوناقتىڭ بىزدەن كەتەر شاعى بولدى»، - دەپ ۇيدە وتىرىپ ايتقان قىزدىڭ ولەڭىن ەستىگەندە، «وۋ، ۇيدە كىم بار؟ قوناقپىز»، - دەسىپ كەلگەندەر ءتىل قاتپاي كەتە بەرەدى ەكەن.
وسىلايشا باي نەشە جىل بوي قوناقتان ادا بولىپتى. ال قىزىنىڭ «اقىندىعى» ەلگە تاراپتى. ولەڭنىڭ قارىمىن تاۋىپ ايتۋعا شامام بولار دەگەن ءبىر جىگىت، ءبىر توپ جولداستارىمەن قىزدىڭ اۋىلىنا كەلىپ: «قوناقپىز!» دەۋى سول ەكەن، قىز داعدىلى ولەڭدى سىرتقا شىقپاي، ۇيدە وتىرىپ- اق اندەتە ايتىپ سالادى.
سوندا جىگىت:
«اۋىلىڭنىڭ قونعان جەرى بەلەستە ەكەن،
اكەڭنىڭ ىزدەگەنى كەڭەس پە ەكەن.
بۇل ۇيگە ءبىز دە قوناق، قىز دا قوناق،
ەكى قوناق ءبىر جاتسىن دەمەس پە ەكەن»، - دەپتى جىگىت. قىز دا، اكەسى دە ۇيدەن جۇگىرىپ شىعىپ، كەلگەندەردىڭ اتىن بايلاپ، ۇيگە ءتۇسىرىپ، قوناق رەتىندە كۇتىپ الىپتى...
massaget.kz