ن. نازاربايەۆتىڭ ۇسىنىسىنا وراي تۇركى تىلدەس ەلدەر تەلەارناسى حابار تاراتا باستايدى

باكۋ. قازاقپارات - بىرلەسكەن تۇركى تەلەارناسى قۇرىلۋدا، بۇل تۋرالى شەشىم قابىلداندى، دەپ حابارلادى تۇرك پ ا- نىڭ الەۋمەتتىك، مادەني جانە گۋمانيتارلىق ماسەلەلەرى بويىنشا كوميتەتىنىڭ وتىرىسىندا تۇركى كەڭەسىنىڭ ديرەكتورى زامين اليەۆ.

ول ق ر پرەزيدەنتى ن. نازاربايەۆتىڭ تۇركى تىلدەس ەلدەر باسشىلارىنىڭ سامميتىندە تەلەارنانى قۇرۋ تۋرالى ۇسىنىسىنان كەيىن ۇيلەستىرۋ توبىنىڭ قۇرىلعانىن اتاپ ءوتتى.

«بيىلعى جىلدىڭ قازان ايىنىڭ سوڭىندا ۇيلەستىرۋ كەڭەسىنىڭ وتىرىسى كەزىندە ارنانى قۇرۋ شەشىم قابىلداندى. ارنانىڭ قۇرىلىمى باسقارما، ديرەكتورلار كەڭەسى جانە رەداكسيا قۇرامىنان قۇرالادى. تەلەارنا حابارلارى اعىلشىن ءتىلدى جانە تۇركى تىلدەس ەلدەردىڭ مەملەكەتتىك تىلدەرىندە تاراتىلىپ، «Al Jazira»، «Euronews» ارنالارىنىڭ دارەجەسىمەن تەڭ حالىقارالىق دارەجەگە يە بولادى. قازىرگى ۋاقىتتا سىناۋلىق حابار تاراتۋلار جۇرگىزىلۋدە، كوپ ۇزاماي تەلەارنا ءوز جۇمىسىن باستايدى»، - دەدى ز. اليەۆ.

ول ارنانى «Eurasia Life» دەپ اتاۋ قابىلدانعانىن، ءبىراق ونىڭ وزگەرتىلۋى دە مۇمكىن ەكەنىن اتاپ ءوتتى.