وڭتۇستىك قازاقستاندىق ديزاينەر كيىز بۇيىمدار بەتىندە ءۇش ولشەمدى سۋرەتتەر بەينەلەۋدە
ولار بولەك باسىلىپ، جاپسىرىلعان بولشەكتەر رەتىندە ەمەس، رەلەفتى سۋرەتتەر تۇرىندە سالىنعان ءۇش ولشەمدى كارتينالار اسەرىن بەرۋدە، دەپ حابارلايدى yujanka.kz.
ايگۇلدىڭ بۇل ونەرى بالالىق شاقتان باستاۋ الادى. شىعارماشىلىققا قاتىسى از وتباسىنان شىققان ءبۇلدىرشىن قىز قولىنا بوياۋ، قارىنداشتارىن الىپ، ساعاتتار بويى سۋرەت سالىپ وتىراتىن. اتا- اناسى قىزىنىڭ قىزىعۋشىلىعىنا نازار اۋدارماسا دا، وعان شىمكەنتتەگى قاستەيەۆ اتىنداعى كوركەم سۋرەت ۋچيليشەسىنە تۇسۋگە رۇقسات بەرگەن. ودان كەيىن ت. جۇرگەنوۆ اتىنداعى مەملەكەتتىك ونەر اكادەمياسىنا ءتۇسىپ، ءوزى ارمانداعان كيىم ديزاينەرى ديپلومىن قولىنا ۇستادى. ءدال وسى ءبىلىم ورداسىنىڭ قابىرعاسىندا جۇرگەندە ايگۇل كورمەلەرگە قاتىسا باستاعان.
ول م. جۇماعاليەۆتىڭ جەتەكشىلىگىمەن 1998 - جىلى قازاقستاننىڭ جاڭا استاناسى - استانا قالاسىنىڭ تۇساۋكەسەرىندە كورسەتىلگەن «ۇماي ءتاڭىرى» كيىمدەر توپتاماسىن شىعاردى. ال 2000 - جىلى الماتىدا «سىمبات» ءسان اكادەمياسىنىڭ ۇيىمداستىرۋىمەن وتكەن ХХІ عاسىردىڭ جاس سانگەرلەرى بايقاۋىندا «ماليەۆيچكە ارنالعان» توپتاماسى ءۇشىن ايگۇل ارنايى ديپلوم الدى. ودان كەيىن دە بۇكىل قازاقستان جانە شەتەلدەردە وتكەن كوپتەگەن بايقاۋ، كورمە، ءسان كورسەتىلىمدەرىنەن ءبىر رەت بولسا دا جۇلدەسىز ورالماعان ەدى.
بۇگىندە ايگۇل ءسادۋاقاسوۆا - م. اۋەزوۆ اتىنداعى و ق م ۋ- ءنىڭ «كوركەم سۋرەت جانە ديزاين» كافەدراسىنىڭ وقىتۋشىسى.
قازىرگى كەزدە ايگۇلدىڭ اينالىسىپ جۇرگەن جاڭا ءبىر ءىسى - ول كيىز. ديزاينەر كولەمدى جۇمىستار جاساۋ ادىستەمەسىن ويلاپ شىعاردى. ايگۇلدىڭ قولىنان شىققان كيىمدەردە، باس كيىمدەر مەن پاننولاردا گۇلدەردىڭ، ويۋ- ورنەكتەردىڭ، جانۋارلاردىڭ سۋرەتتەرىن كورۋگە بولادى.
ايگۇل اسىرەسە كيىز، ماتا، ءجۇن، بىلعارىدان پاننو جاساۋدى قاتتى ۇناتادى. «نازىكتىك» دەپ اتالاتىن ەڭ العاشقى ەڭبەگىن بىرنەشە جىل بۇرىن جاساپ، اناسىنا سىيعا تارتقان. العاشىندا ءوز جۇمىستارىن دوستارىنا سىيعا بەرگەن، كەيىن تۋىندىلارىنا تاپسىرىستار تۇسە باستادى.
ايگۇلدىڭ تاعى ءبىر قىزىعۋشىلىعى - پەچۆورك - قۇراق ديزاينى. ول قازاقتىڭ ۇلتتىق قولونەرى - قۇراق قۇراۋعا ۇقساس بولىپ كەلەدى. ءاربىر قازاق وتباسىندا ءتۇرلى- ءتۇستى قۇراقتاردان تىگىلگەن كورپەشەلەر مەن جاستىقتار بار. ايگۇل بولسا، ولاردان كارتينالار جاساي باستادى.
وتكەن جىلى گازەتتەن قۇراق شەبەرلىگىنىڭ بايقاۋى تۋرالى وقىعان ايگۇل وعان قاتىسۋدى شەشتى. دايىندىققا ءبىر جىل ۋاقىتى كەتتى. قازىلار القاسىنا ەكى تۋىندىنى - تانىمال سۋرەتشىلەردىڭ پەچۆورك ستيلىندە ورىندالعان كارتينالارىنىڭ كوشىرمەسىن ۇسىنۋ كەرەك بولدى. ول ۆ. گۆوزديەۆتىڭ «تاۋداعى ءتۇن» جانە پ. ماندرياننىڭ « قىزىل، كوك، قارا جانە سارى» اتتى ەڭبەكتەرىن تاڭدادى. ىرىكتەۋ كەزەڭىنەن سۇرىنبەي وتكەن ول بيىلعى جىلدىڭ 18 - قازانى مەن 8 - قاراشاسى ارالىعىندا الماتى قالاسىنداعى قاستەيەۆ اتىنداعى مۇراجايدا وتكەن جارمەڭكە بايقاۋىنا شاقىرۋ الدى. ونىڭ شىعارمالارى «اۋەسقويلار» اتالىمىندا ۇزدىك دەپ تانىلدى، ونىمەن قوسا، جەڭىستەر قورجىنى تاعى ءبىر ءبىرىنشى ورىنمەن تولىقتى.
«جۇلدە رەتىندە ماعان باعدارلاماسىندا 85 وپەراسياسى قامتىلعان تىگىن ماشيناسىن تارتۋ ەتتى. قازىرگى كەزدە يتالياداعى بايقاۋعا دايىندالىپ ءجۇرمىن، بۇل سىيلىق مەنىڭ پايداما استى»، - دەيدى ايگۇل.