قازاق حاندىعى تۋرالى سەريالدىڭ سەناريى دايىن بولدى - ا. مۇحامەدي ۇلى
بۇل تۋرالى «قازاقپارات» تىلشىسىنە بەرگەن سۇحباتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«وزدەرىڭىز بىلەسىزدەر، ەلباسىمىز وسى شاراعا بايلانىستى قازاق حاندىعى تۋرالى سەريال ءتۇسىرۋ كەرەك دەپ ايتتى. بىز ارينە ول سەريالدىڭ سەناريىن جاسادىق. وتە كۇردەلى دۇنيە. سونداي-اق، بىزدە سەريال عانا بولمايدى، دەرەكتى جانە انيماتسيالىق فيلمدەر دە كەرەك. بۇلدىرشىندەر دە ءوز ەلىنىڭ تاريحىن ءبىلۋى ءتيىس. وسى شارالاردىڭ بارلىعىن شاشىراتپاي، جوعارى دەڭگەيدە وتكىزۋ - ول ءبىزدىڭ مىندەتىمىز»، - دەدى مينيستر.
ونىڭ ايتۋىنشا، ۇسىنىس تاستالعان رەجيسسەرلىك توپتار بار، دەگەنمەن ولاردىڭ قايسىسى جۇمىسقا تارتىلاتىنى انىقتالعان جوق.
«رەجيسسەر قازاقستان ازاماتى بولاتىنى - ناق. رۇستەم ابدىراشيەۆ ءوزىنىڭ جۇمىس توبىمەن جۇمىس جاساۋدا. تاعىدا ءبىز اقان ساتايەۆقا دا ۇسىنىس بەردىك. كىمنىڭ سەناريىلىك توبى قىزىقتىراق، سونىكى مىندەتتى تۇردە بولادى. ونى كوركەمدىك كەڭەس شەشەدى. قازىر ءبىز سەناريدىڭ نەگىزىن جاسادىق. سونى ءبىزدىڭ عالىمدارعا تالقىلاۋعا بەردىك. نەگە دەسەڭىزدەر، بۇل - وتە كۇردەلى دۇنيە. قاتەلىك جاساماۋىمىز شارت»، - دەيدى ا. مۇحامەدي ۇلى.
باس رەجيسسەر قازاقستاننان بولادى. دەگەنمەن باسقا دا كومەكشى رەجيسسەرلەردى شەتەلدەن شاقىرۋ جوسپارلانىپ وتىر. «نەگە دەسەڭىزدەر، قازاقستاندا تاريحي تاقىرىپقا سەريال ءالى ءتۇسىرىلىپ كورگەن ەمەس. كوركەم فيلمدەر بار ارينە، ەرمەك تۇرسىنوۆ، ساتىبالدى نارىمبەت، رۇستەم ءابدىراشوۆ سىندى رەجيسسەرلەر جاسادى ونى. ءبىراق تاريحي تۇرعىدان ءبىزدىڭ قازقستاندا ءالى سەريال تۇسىرىلمەگەن. سول ءۇشىن ءبىز بۇل جانرعا وتە مۇقيات بولۋىمىز كەرەك»، - دەدى مينيستر.
«قازاق مەملەكەتتىلىگىنىڭ 550 جىلدىعى تەك قانا تويلاپ اتاپ ءوتۋ ءۇشىن جاسالىپ جاتقان ريتۋالدىق مەرەكە ەمەس، ەڭ ءبىرىنشى - قازاقستان ەگەمەندىگىنىڭ تاعى دا ءبىر كورىنىسى، ونىڭ تۇعىرىن نىعايتاتىن ناقتى شارا. سونىمەن بىرگە، تاريحقا قاتىستى كوپتەگەن پىكىرلەر بار، 550 جىلدىعى ەمەس، ودان اسىپ كەتكەن دەپ جاتىر. ءبىراق، حايدار دۋلاتي مەن وزگە دە تاريحشىلاردىڭ دەرەكتەرىنە سۇيەنىپ، ءبىز 2015 - جىل - قازاق حاندىعىنىڭ 550 جىلدىعى دەيمىز»، - دەپ ءتۇيدى ءسوزىن ا. مۇحامەدي ۇلى.
اۆتور: جاسۇلان جولدىبايەۆ