پاۆلوداردا تاڭعاجايىپ «ستۋدەنتتىك بال» ءوتتى - فوتو
بۇگىنگى ستۋدەنتتىك بالدا كەز كەلگەن جان ءبيدىڭ تاڭعاجايىپ الەمىنىڭ ەسىگىن اشتى. سۇڭعىلا بويلى بوزبالالار مەن سۇلۋ بويجەتكەندەر وركەستردىڭ تامىلجىتا سالعان اۋەنىمەن زالعا ەندى.
ستۋدەنتتىك بالدىڭ قۇرمەتتى قوناعى س. تورايعىروۆ اتىنداعى پ م ۋ رەكتورى، پروفەسسور سەرىك ومىربايەۆ بولدى. ول ستۋدەنتتەردى ءبي بالىنىڭ تۇساۋ كەسەرىمەن قۇتتىقتادى. سەرىك ماۋلەن ۇلى ءوز سوزىندە پاۆلودار مەملەكەتتىك ۋنيۆەرسيتەتىندە ستۋدەنتتەر ساپالى ءبىلىم الۋمەن قاتار شىعارماشىلىق باعىتتا جان-جاقتى دامۋىنا مۇمكىندىكتەر جاسالعانىن اتاپ ءوتتى.
جاستار ءىسى جونىندەگى كوميتەت ءتوراعاسى اقبوتا سارىبايدىڭ ايتۋىنشا بۇل شاراعا ۇيىمداستىرۋشىلار كوپ ۋاقىت بويى بايىپپەن دايىندالعان. ماسەلەن، ۇيىمداستىرۋشىلار دەبيۋتانتتار ءۇشىن كاستينگ وتكىزۋ، بال ەتيكەتىن مەڭگەرۋ جانە ماڭىزدىسى كلاسيكالىق ءبي ونەرىن يگەرۋ سىندى جۇمىستاردى اتقارۋعا تۋرا كەلگەن. قاتىسۋشىلاردىڭ ءساندى كيىمدەرى ⅩⅨعاسىر مانەرى مەن رۋحىندا وتكەن ءبي بالىنىڭ سالتاناتى مەن شىرايىن كەلتىردى.
كورەرمەندەر مەن ءادىلقازىلار القاسى نازارىنا كلاسيكالىق ءبي ۇلگىلەرى، ونىڭ ىشىندە پولونەز، پولكا، مازۋركا بيلەرى ۇسىنىلدى. كەشتىڭ ەكىنشى بولىمىندە دەبيۋتانتتار ءبي، ساحنالىق وبراز جانە ۆوكالدىق دارىندارىن بايقايتىن ءۇي تاپسىرمالارىن ورىندادى. سونداي-اق كەش باعدارلاماسىندا س. تورايعىروۆ اتىنداعى پ م ۋ ستۋدەنتتىك فيلارمونيانىڭ ءبي توپتارى مەن انشىلەرى ونەر كورسەتتى.
مۇنىمەن قوسا، كەش باعدارلاماسى شەڭبەرىندە «كورەرمەن كوزايىمىنىڭ حانزاداسى مەن حانشايىمى»، «جاستار ءىسى جونىندەگى كوميتەتتىڭ حانزاداسى مەن حانشايىمى» نوميناتسيالارى بويىنشا جۇلدەلەر تابىس ەتىلدى، عالامتوردا قوسىمشا داۋىس بەرۋ ارقىلى «حانزادا مەن حانشايىم» انىقتالدى. ال «پ م ۋ حانزاداسى مەن حانشايىمى» اتانعان الماس ءماجيت پەن ماحاببات قانابەكوۆا بولدى.