قانات يسلام مەن گولوۆكين رينگتە كەزدەسپەيدى - ۆيكتور دەميانەنكو

استانا. قازاقپارات - قازاقستان كاسىپقوي بوكس فەدەراتسياسىنىڭ باسشىسى، وليمپيادا ويىندارىنىڭ كۇمىس جۇلدەگەرى ۆيكتور دەميانەنكو گەنناديي گولوۆكين مەن قانات يسلامنىڭ شارشى الاڭدا كەزدەسۋىنە كۇمانمەن قارايتىنىن ايتتى.

 گولوۆكيننىڭ كومانداسى ءۇشىن بۇل كىرىسى از جەكپە- جەك بولعاندىقتان ولار باس تارتادى دەپ مالىمدەدى ول Vesti.kz پورتالىنا بەرگەن سۇحباتىندا.

«مەن قانات يسلامنىڭ كاسىپقوي بوكستاعى سوڭعى جەكپە- جەكتەرىن كورە المادىم. مەنىڭ ويىمشا، قوس بوكسشىنىڭ كەزدەسۋى ەشقانداي پروموۋتەرگە تابىس الىپ كەلمەيدى. ويتكەنى، قانات يسلام گولوۆكين سەكىلدى ءالى تانىمال بولا قويعان جوق. ونىڭ دەڭگەيى دە بولەك. ەكەۋىنىڭ اراسىنداعى رەيتينگ وتە الشاق. ال، قوس بوكسشىنىڭ پروموۋتەرلەرىنە قىزىقتان كورى تابىس كەرەك، تابىس تۇسپەسە ولار كەلىسسوز جۇرگىزبەيدى. HBO تەلەارناسى مۇنداي كەزدەسۋلەردى كورسەتپەيدى» دەدى دەميانەنكو ءوز سوزىندە.

«ەكى قازاقستاندىق بوكسشىنىڭ جەكپە- جەگىن كورۋ بىزگە عانا قىزىق، الەم حالقى گولوۆكيننىڭ امەريكالىقپەن، مەكسيكالىقپەن نەمەسە تاعى وزگە ەلدەردىڭ بوكسشىلارىمەن جۇدىرىقتاسقانىن كورگىسى كەلەدى. سوندىقتان قانات پەن گەنناديدىڭ جەكپە- جەگىن كۇتىپ جۇرگەندەر اۋرە بولماسىن، ول ەكەۋى كاسىپقوي بوكستىڭ رينگىندە جولىقپايدى» دەپ سەنىممەن اتاپ ءوتتى ارداگەر بوكسشى.

 ايتا كەتەيىك، بۇعان دەيىن قانات يسلامنىڭ پروموۋتەرى نەلسون لوپەس ءوز شاكىرتىنىڭ گولوۆكينمەن شىققىسى كەلەتىنىن مالىمدەگەن بولاتىن.

Baq.kz