گرەكيانىڭ ەكس-ءمينيسترى زايىبىمەن بىرگە باس بوستاندىعىنان ايىرىلدى

استانا. قازاقپارات - افينى سوتى گرەكيانىڭ ەكونوميكا جانە قورعانىس ءمينيسترى يواننيس (ياننوس) پاپانتونيۋ مەن ونىڭ زايىبى ستاۆرۋلۋ كۋراكۋدى 1,3 ميلليون ەۋرو كىرىستى جاسىرعانى ءۇشىن شارتتى تۇردە ءتورت جىلعا باس بوستاندىعىنان ايىردى، دەپ حابارلادى شەتەلدىك ب ا ق.

پاپانتونيۋعا 2009 - جىلعى دەكلاراتسيادا شۆەيتساريا بانكىندەگى ەسەبىنە اۋدارىلعان سومانى مالىمدەمەگەنى ءۇشىن ايىپ تاعىلىپ وتىر.

ۇكىمگە سايكەس تۇرمە مەرزىمىنىڭ ءار كۇنى 10 ەۋروعا باعالاندى. شەشىم سوتقا شاعىمدانعانعا دەيىن شارتتى بولىپ تابىلادى.

بەيسەنبى كۇنى 2008 - جىلعى سالىق دەكاراتسياسىنا ناقتى مالىمەت بەرمەگەن پاپونتونيۋدىڭ ەكىنشى ءىسى قارالادى.

65 جاستاعى پاپانتونيۋ 1994 - جىلى ۇلتتىق ەكونوميكا ءمينيسترى، 1996-2001 - جىلدارى ۇلتتىق ەكونوميكا جانە قارجى ءمينيسترى، 2001-2004 - جىلدارى قورعانىس ۆەدومستۆوسىنىڭ باسشىسى بولعان. ول گرەكيانىڭ ەۋروپالىق ۆاليۋتا وداعىنا كىرۋىنە باستاماشى بولعان.