كانادادا جەمىستى ەڭبەك ەتەتىن قازاقستاندىقتار
بۇگىندە وزگە ەلدە ۇلتتىق-مادەني شارالار وتكىزىپ، ءتول تاريحىمىز بەن سالت-ءداستۇرىمىزدى ناسيحاتتاپ، ءوز انا تىلىمىزدە سويلەيدى. قازىر تورونتو قالاسىندا تاتۋ-ءتاتتى ءومىر ءسۇرىپ جاتقان وتانداستارىمىزدىڭ سانى 500 گە جەتىپ وتىر. تورونتودا تاڭەرتەڭگىلىك ۋاقىت. ءىسى ورگە دومالاعان كانادالىق كاسىپكەر حازرەت ساپەنوۆ كەزەكتى كەزدەسۋگە اسىعىپ بارادى. ءوزى - ۇزدىك ماتەماتيك جانە باعدارلاماشى، قاراعاندى قالاسىنىڭ تۋماسى.
قازىر سولتۇستىك امەريكادا Cloudcor كومپانياسىنىڭ يەسى، حالىققا ونلاين قويمالار قىزمەتىن كورسەتۋمەن اينالىسادى. بۇگىندە كاسىپكەر Universal Pictures, Shell, IBM, Intel
سىندى كومپانيالارمەن ارىپتەستىكتە جۇمىس ىستەيدى. حازرەت ساپەنوۆ، Cloudcor كومپانياسىنىڭ يەسى: - باسىندا جالعىز بولدىم، 2-3 جىل ىشىندە كومپانياداعى ادام سانى 15 ادامعا جەتتى. كومپانيانى ءوزىمنىڭ جيناپ-تەرگەن باستاپقى كاپيتالىما قۇردىم. ول شامامەن - 50 مىڭ ا ق ش دوللارى.
ال بۇگىن بۇل كومپانيانىڭ قۇنىن 7 ميلليون ا ق ش دوللارىنا دەيىن باعالايتىن ەدىم. جۇمىس باستىلىعىنا قاراماستان، حازرەت جەرلەستەرىمەن قۋانا كەزدەسىپ تۇرادى. ول - تورونتوداعى قازاقستاندىقتار قاۋىمداستىعىنىڭ نەگىزىن سالۋشىلاردىڭ ءبىرى. قازاق ەلىنىڭ مادەنيەتى مەن ءتىلىن ساقتاپ قالۋ كاناداعا قونىس اۋدارعان وتانداستارىمىز ءۇشىن وتە ماڭىزدى.
حازرەت ساپەنوۆ، Cloudcor كومپانياسىنىڭ يەسى: - مەنىڭ ويىمشا باسقا ەلگە قونىس اۋدارعان كەز كەلگەن ۇلت وكىلى ءوزىنىڭ انا ءتىلىن ساقتاپ قالۋعا تىرىسادى، ويتكەنى ءبىزدىڭ بالالارىمىز اعىلشىن تىلىندە سويلەيتىن ورتاعا تۇسكەندىكتەن ۇمىتا باستايدى. سوندىقتان ءبىز ۇيدە قازاق جانە ورىس تىلىندە سويلەۋگە تىرىسامىز. ال باسقا جەرلەردە ولار اعىلشىنشا، فرانسۋزشا سويلەي الادى. كانادا بارلىق قونىس اۋدارۋشىلارعا ۇلكەن مۇمكىندىك بەرەدى.
بۇل مۇمكىندىكتەردى ءساتتى ىسكە اسىرا الاتىنداردىڭ قاتارىندا قازاقستاندىقتار بار. وزگە ەلگە، جەرگە بەيىمدەلۋ وڭايعا تۇسپەسە دە، كاناداعا كوشىپ كەتكەن وتانداستارىمىزدىڭ بارلىعى تۇراقتاپ قالعان.
ءلايلا ەرمەكبايەۆا، تورونتوداعى قازاقستاندىقتار قاۋىمداستىعىنىڭ پرەزيدەنتى: - جاسقا قاراماستان، بۇل ەلدە ءومىرىڭدى ءارقاشاندا قايتا جاڭادان باستاۋعا مۇمكىندىگىڭ بار. ماعان ۇنايتىنى سول. مەنىڭ ۇلىم قازاقستاننان كەلگەن ءوز جەرلەسىنە ۇيلەندى. وتباسىن قۇرىپ، ماعان 2 نەمەرە سىيلادى. قازاقستاندىقتار قاۋىمداستىعى جىل سايىن اتالىپ وتەتىن ناۋرىز، تاۋەلسىزدىك كۇنى جانە جاڭا جىلدىق مەرەكەلەردە باس قوسادى. ال جازعى ايلاردا تابيعاتقا شىعىپ، قازاق داستارقانىن جايادى. مۇنداي كەزدەسۋلەرگە كانادالىقتاردا ۇلكەن قىزىعۋشىلىق تانىتىپ، قازاقستان جايلى ايتىلعان اڭگىمەلەردى قۋانا تىڭدايدى ەكەن. اۆتورلارى: اينۇر ابديەۆا، تايا رتيشيەۆا، يگور يلين
24.kz