پاۆلوداردا «الەم بارىسى» كورەرمەندەرى ءبىر كولىكتىڭ ورنىنا ەكى كولىك الدى
«الەم بارىسى» حالىقارالىق تۋرنيرىنىڭ كورەرمەندەرى اراسىندا ۇتىس بيلەتكە قاتىستى داۋلى ماسەلەگە نۇكتە قويىلدى، دەپ حابارلادى «قازاقستان بارىسى» سپورت ليگاسىنىڭ باسپا ءسوز قىزمەتى.
«قازاقستان بارىسى» قازاقشا كۇرەستى دامىتۋ قورى لوتەرەيا جەڭىمپازدارىنا بىردەن ەكى كولىك سىيلادى.
ەسكە سالساق، 25 - قازاندا پاۆلوداردا «الەم بارىسى» حالىقارالىق تۋرنيرى ءوتتى، وندا قازاقشا كۇرەس باسەكەسىنىڭ ءداستۇرى بويىنشا كورەرمەندەر اراسىندا كولىككە ۇتىس ويىنى ۇيىمداستىرىلدى.
ۇتىس كەزىندە كۇتپەگەن جاعداي ورىن الدى: تيپوگرافيانىڭ قاتەلىگىنەن ۇتىس بيلەتىنىڭ يەگەرلەرى ەكى ادام بولىپ شىقتى. تۋرنيردى ۇيىمداستىرۋشىلار باسپانىڭ قاتەسى ءۇشىن باقىتتى كورەرمەندەردىڭ ءبىرىن رەنجىتۋگە جول بەرە المايتىندارىن مالىمدەدى. ءسويتىپ، ەكى پاۆلودارلىق ەكى كولىكتىڭ كىلتىن الدى. Nissan Almera ماركالى اۆتوموبيلدىڭ يەگەرلەرى - ءعادىلجان كارىموۆ پەن اسەمگۇل مۋسينا.