ءازىربايجان تاۋلى قاراباق اۋە كەڭىستىگىن جاپتى

استانا. قازاقپارات - ءازىربايجان ۇشۋلار ءۇشىن تاۋلى قاراباق اۋە كەڭىستىگىن جاپتى، - دەپ حابارلايدى ر ي ا نوۆوستي.

اقپارات قۇرالدارىنىڭ مالىمەتىنشە، بۇل جونىندە ازاماتتىق اۆياتسيا حالىقارالىق ۇيىمىنىڭ بارلىق مۇشەسىنە ەسكەرتىلدى. «ءازىربايجان باسىپ الىنعان اۋماقتاردىڭ ۇستىندەگى اۋە كەڭىستىگىن ۇشۋلار ءۇشىن جاپتى جانە بۇل جونىندە ءتيىستى تارتىپپەن ازاماتتىق اۆياتسيا حالىقارالىق ۇيىمىنىڭ بارلىق مۇشەسىنە حاباردار ەتىلدى»، - دەلىنگەن ءازىربايجان سىرتقى ىستەر مينيسترلىگىنىڭ حابارلاماسىندا.

ەسكە سالا كەتەيىك، بۇعان دەيىن ەلدىڭ قورعانىس مينيسترلىگىنىڭ وكىلدەرى رەسپۋبليكا قارۋلى كۇشتەرىنىڭ «ارمەنيا رەسپۋبليكاسىنىڭ قارۋلى كۇشتەرىنە تيەسىلى م ي-24 ماركالى تىكۇشاقتى اتىپ تۇسىرگەنىن» حابارلاعان ەدى. بۇل تىكۇشاق «اسكەري باعىت الىپ، ءازىربايجان قۇرىلىمدارىنا شابۋىل جاساۋعا ارەكەتتەنگەن». ال مويىندالماعان تاۋلى قاراباق رەسپۋبيكاسى قورعانىس مينيسترلىگىنىڭ وكىلى سەنور اسراتياننىڭ ايتۋىنشا، ول - ت ق ر-دىڭ وقۋ-جاتتىعۋ ۇشۋىن ورىنداعان تىكۇشاعى.

تاۋلى قاراباق ارمياندارى كوپ وبلىس ءازىربايجان ك س ر-ءى قۇرامىنان ءبولىنىپ شىعۋدى جاريالاعان 1988-جىلدان بەرى جانجال ايماعىنا اينالدى. 1992-1994-جىلدارداعى سوعىستان كەيىن ءازىربايجان بۇل ايماققا جانە وعان ىرگەلەس جەتى اۋدانعا باقىلاۋ جاساۋدان ايىرىلدى. تاۋلى قاراباق ءوز تاۋەلسىزدىگىن جاريالادى، ءبىراق ءالى كۇنگە دەيىن ارمەنيا مەن ءازىربايجان اراسىنداعى كەلىسسوز تارابى بولا الماي كەلەدى.